Kan tuihalna tihlan a ngai - Enrique

Paris Saint-Germain manager Luis Enrique chu season thar bul an ṭan danah a lawm a, chutihrualin a naute chu champion duha tuihal an nihna khelmual chhungah a taka lantir zel turin a fuih.

Ligue 1 champion hian an match hmasa berah Le Havre chu 4-1 in an sawp. Zanin dar 12:15 hian Parc des Princes-ah ngei mai Monetpellier an mikhual dawn, thawm ring tak nena mikhual thlen a duh a ni.

PSG tana season hmasa bera nomawi pathum chawitu Enrique chuan, "Season hmasa khan nomawi pathum chu kan chawi ngei mai, mahse kan title laksa te kha kumin atan kan chhawm zui ngawt thei lo.

"Player ṭhenkhat an chhuak a, midang an lo kal thar bawk. Chuvangin team kan indinthar leh mek a ni a, training-na lamah pawh kan thawkrim tlang hle bawk, tute mai pawh hian champion an duhna leh an châkna chu kuminah pawh a taka an lantir ka duh," tiin a sawi.

PSG hian an player ṭha, club tana goal khung tam ber Kylian Mbappe an chelh thei lo a, contract hmang zoin Real Madrid a pan san, a chhuak dawn tih a chian hnu khan Enrique hian a naute hi Mbappe tel loa khelh dan a lo zirtir lawk tawh.

France captain Mbappe chhuak mah se player ṭhenkhat an la lut, an lak thar zingah Joao Neves a langsar - Portuguese midfielder hian Paris club tana a match hmasa berah bench aṭanga lut chungin Ousmane Dembele leh Bradley Barcola te khung tur a siamsak, zaninah chuan bul a ṭan ngei a rinawm.

Spanish manager Enrique chuan, "Neves khelh dan khan min tilawm, a fingin team tana ṭha tur kha a ngaihtuah chhuak hman zung zung mai a, hun rei lote chhungin PSG khelh dan phung a thiam nghal tih a takin kan hmu," a ti.