Sinner hmahruaina a sang hret

Association of Tennis Professionals (ATP) ranking thar berah Jannik Sinner chuan dinhmun sang ber a luah chhunzawm a, amah hnaih bertu Novak Djokovic aiin point 1900 zetin hma a hruai mek.

Mipa tennis thuneitu sang ATP ranking chhuak tharah hian, Italian tlangval Sinner hian hma a hruai nghet chho zel a, tun anga a kal a nih chuan a chung bera awm chunga kum tawp hmang turin a dinhmun a siam ṭha chho ta hle a ni.

Chutihrualin, world number 2 Djokovic leh number 3 Carlos Alcaraz te hi ngaihthah theih an ni lo. Kar leh maia inelna lian US Open an khel leh dawn a, champion tan ranking point 2000 ngawt hmuh theih a ni ang.

Tennis huangah hian nomawi mai bakah ranking hi inelna a tling, a bik takin world number 1 ni chunga season tawp an hman zat hi an ngaihlu ṭhin - Alcaraz ngei pawhin kuminah number 1 ni chung ngeia hun tawp hman a duh thu a lo sawi tawh.

Tun season atan hian US Open chauh ni loin ATP Finals khelh hmabak an la nei bawk, a thiam zual pariat inelna hi major tournament dawta ngaihhlut zinga mi a ni, hei vang hian ranking pawh hi nasa taka danglam thei a la ni ang.

Player ṭha zual pathum hian US Open an ngaipawimawh dawn hle. Djokovic hian Olympic gold medal a lak hnuah inelna a la hmachhawn leh lo a, tunah erawh New York khawpui pan turin a inpeih leh tawh.

Serbian star Djokovic chuan, "Kum 37 mi ka ni tawh a, Paris Olympic gold medal la tur khan kum 21 mi Alcaraz ka hneh, ani kha tunlai khawvela player ṭha berte zinga mi a ni, tun season chhungin French Open leh Wimbledon title a la.

"Player naupang leh ṭha zawkte lakah hnehna ka la chang thei tih a takin ka lantirah ka ngai a, chu chuan phurna pawh nasa takin min siamsak," tiin US Open khel tura a inpeih thu a sawi chhuak.

Sinner pawhin tun hnaiah damdawi hman phal loh hman chungchang vangin buaina a nei a, a fihlim tih sawi ni tawh mah se a rilru a nghawng a, engtiang takin nge tennis court pawn lam buaina hian a inkhelah nghawng a neih dawn hriat a châkawm tawh hle.