Best FIFA Men’s Player Lewandowski

FIFA hnuaia chawimawina sang The Best FIFA Football Awards 2020 ceremony chu Ningani zan khan Zurich-ah neih a, Poland leh FC Bayern Munich striker Robert Lewandowski chuan Best FIFA Men’s Player chawimawina a dawng.

Best FIFA Women’s Player Award chu England leh Manchester City full back Lucy Bronze hnenah an hlan. Goalkeeper ṭha ber atan Manuel Neuer thlan a ni a, coach ṭha berah Jurgen Klopp thlan a ni.

Asian tlangval Son Heung-min-a'n FIFA Puskas Award a dawng. South Korean forward hian nikum December thla khan Burnley an hmachhawn ṭumin a khalh tlang a, goal ropui hian chawimawna sang a dawn phah a ni.

German football legend Lothar Matthaus chuan, "Lewandowski hian chawimawina hi a dawng lo a nih chuan FIFA hi ka ring leh tawh lo ang," tiin a phu thu a sawi a, a vote hmuh danin engkim a sawifiah. A phu ber hnenah chawimawina pek a ni.

Lewy hian vote 52 a hmu a, Cristiano Ronaldo (38) leh Lionel Messi (35) te chungah an awm. Hetihlai hian Neymar erawhin Champions League final meuh thleng mah se point 16 hmuin pakuana a ni pha chauh.

Poland striker Lewandowski hian Bavarians hi Bundesliga, DFB Pokal, DFL-Supercup, Champions League leh UEFA Super Cup-ah a champion pui a, kum 2020 chhungin nomawi panga a chawi tihna a ni. 

Kum 2019–20 season hian Lewy-a'n Bundesliga match 31 aṭangin goal 34 a khung a, UCL match 10 aṭangin goal 15, DFB Pokal match nga aṭangin goal ruk a khung a, top scorer a ni vek. Season liam ta hian match 47 aṭangin goal 55 a khung a, a record hi ropui tham hle.

Tun season-ah pawh Lewy hian league match 11 aṭangin goal 15 a khung leh tawh a, inelna hrang hrang match 17 aṭangin goal 18 a khung. Kum 2020 bikah Lewy hian chawimawina tam tak a dawng a, chung zinga langsar chu UEFA Men's Player of the Year, World Soccer Player of the Year, Tuttosport Golden Player, FourFourTwo Player of the Year Award leh Footballer of the Year in Germany te a ni a, Covid-19 vangin kuminah Ballon d'Or sem a nih loh avangin a vanduai thung.

Robert Lewandowski zin kawng hi mi ropui dangte ang thoin a chhuk chho hle. Kum 17 a nihin a pa Krzysztof-a'n a thih san a, fourth division club Delta Warsaw aṭangin an ram club ṭha Legia Warsaw a zawm. Amaherawhchu Legia hian Lewy ṭhatna tak an hre lo a, third divison club Znicz Pruszkow hnenah £1,000 chauhin an hralh.

Lewandowski hian Znics-ah hian thla khatah £230 a hlawh a, he club-ah amah aia let thuma hlawh tam pawh an awm. A club hlui Legia hian kum 2008-ah Lewy lakletna remchang an nei a, mahse CD Tenerife forward Mikel Arruabarrena an thlang. 

Polish striker hian Lech Poznan zawmin Legia hian thutlukna an siam sual a, Lewy erawh vul chho zelin Borussia Dortmund a pan hnuah khawvel club ṭha ber zinga mi Bayern Munich tan a khel.

Chawimawina an hlan zanah Lewandowski chuan, "Messi leh Ronaldo te hian hun rei tak chhung an theihna sang tak an lantir tawh a, tunah chuan an zingah ka tel ve thei. Hemi thleng tur hian thawhrim a ngai a, ka teammate-te tel loin chawimawina ka dawng thei lo a, an zarah tun hun hi ka thleng. Ka hlawhtlinna hi ropui ka ti a, hrethiam tak tak tur chuan hun ka mamawh dawn, zanin pawh mut ka harsat ang. Ka hlim em em a ni," tiin a sawi.

Hmasawn zel a tum thu sawi zuiin Lewy chuan, "Nomawi ṭhahnem tak chawi tawh mah ila nomawi dang beiseiin kan thawkrim zel ang. Nomawi vawi khat chawi hi a harsa a, vawi hnih chawi hi a harsa lehzual. Nakkumah mipui nen hlawhtlinna lawm tur kan neih ngei ka beisei," tiin a sawi a, coaching staff leh a teammate-te chungah lawmthu a sawi bawk.

Tun dinhmuna khawvel striker ṭha ber hian a naupan laiin Brazil tlarhma a entawn ṭhin a, Ronaldo leh Romario te a ngaisang ṭhin hle. Kum 16 a nih laiin khawi aṭang pawhin chawr chhuak la, ṭha takin a khel thei tiin a infuih ṭhin. Tunah chuan Poland rama piang kha khawvel player ṭha ber a ni a; Brazil, Argentina leh football khel ram lar a piangten an tluk lo.

Best FIFA Men’s Player    Robert Lewandowski, Poland

Best FIFA Men’s Coach    Jurgen Klopp, Germany

Best FIFA Men’s Goalkeeper    Manuel Neuer, Germany

FIFA Puskás Award-winner    Son Heungmin, South Korea

Best FIFA Women’s Player    Lucy Bronze, England

Best FIFA Women’s Coach    Sarina Wiegman, Netherlands

Best FIFA Women’s Goalkeeper    Sarah Bouhaddi, France

FIFA Fan Award    Marivaldo Francisco da Silva (Brazil)

FIFA Fair Play Award    Mattia Agnese (Italy)

Khawvel hmun hrang hrang aṭangin football player sang chuangin FIFPRO Men’s World11 an thlang a, Best FIFA Men’s Goalkeeper Manuel Neuer lang loin Liverpool keeper Alisson Becker  a lang thung.

Goalkeeper:    Alisson Becker (Liverpool)

Defenders:    Trent Alexander-Arnold (Liverpool), Alphonso Davies (Bayern Munich), Sergio Ramos (Real Madrid) leh Virgil van Dijk (Liverpool)

Midfielders:     Thiago Alcântara (Bayern Munich/Liverpool), Kevin De Bruyne (Man City) leh Joshua Kimmich (Bayern Munich)

Forwards:    Cristiano Ronaldo (Juventus FC), Robert Lewandowski (Bayern Munich) leh Lionel Messi (FC Barcelona)

Brazilian Marivaldo Francisco da Silva hi Sport Club do Recife ṭantu a ni a, home match a hlah ngai lo. Kum 48 mi Marivaldo hian bus chuan man (fare) a neih loh avangin 60 km a hlaa awm stadium chu a pan ṭhin a, darkar 11 vel kein a kal ṭhin. A inpekna hi a nasa bawk a, FIFA Fan Award a dawn phah ta a ni.

Kum 17 mi Mattia Agnese hi Ospedaletti, Italy-a cheng an ni a, an inkhelhnaah a khingpui tlu a hmu a, nikhaw hre loin a awm zui. Agnese hian YouTube aṭangin ni khaw hre loa tlu first aid pek dan hi a lo inzir tawh a, nunna a chhan phah a ni.