Player 10-a khel PSG an tlang Mourinho dawihzep vangin Chelsea an tla
Stamford Bridge-ah lehzel Chelsea-in goal venhim an ngai pawimawh a, player 10-a khel Paris Saint Germain an nawr ngam loh vangin Champions League aṭangin an tla.
Nilaini zan khan Chelsea leh PSG te hun pangngaiah 1-1 in an inhnehtawk. Parc des Princes-a 1-1 tho a an inhnethtawk avangin extra time khelh a ngai a, goal khat ve ve khung lehin 2-2 a ni. Inkhel pahnih belh khawmah 3-3 niin away goal rule-in PSG an chak.
Europe-a inelna sang berah Premier League club la dam pahnih Arsenal leh Manchester City te pawhin an tlak hun an nghak a ni ber. Arsenal hi French club Monaco lakah 1-3 in an tlawm a, Manchester City-in Nou Camp-ah 1-2 a an hneh loh Barcelona an hmachhawn dawn bawk.
Nikum quarterfinal-a an hneh loh Chelsea laka phuba lak tumin PSG London-ah an zin a, harsatna belhchhan turin darkar chanve pelh hretah Zlatan Ibrahimovic chu sawisel theih taka hnawh chhuah a ni.
Chelsea an lungawi bik lo, Edison Cavani-a'n forward Diego Costa lakah foul mah se penalty pek a ni lo.
Spain foward Costa a vannei ve tho, Thiago Silva tlawh vanga yellow card a hmuh hnuah Brazilian defender Marquinhos a nam a, yellow card a hmu nawn lo. Costa hian Champions League-ah minute 508 chhung goal a khung tawh lo.
Chelsea an tam zawk a, an nawr ngam chuang lo. Darkar khat hnuah Edison Cavani-a'n keeper Courtois a bum hnuah goal ban a pet per a, goal a lut lo zel.
Brazilian duo Silva leh David Luiz te'n Chelsea tlar hma tan hun ṭha an pe lo a, corner erawh an veng seng bik lo. Minute 81-naah corner kick chu PSG-in an clear lawk thei lo a, Costa pet pial chu chiang zetin Gary Cahill-a'n a volley goal.
Chelsea-in an hna ngai goal venhim an chhunzawm a, an hlawhtling lo. Inkhelh ṭan tirha mipuiin an 'boo' PSG defender David Luiz-a'n a club hlui lamah chiang zetin a tauh lut a, minute 86-na a ni.
Mourinho-a'n penalty pet a duh lo, goal khung a duh tawh a, Didier Drogba a luh tir, hemi hma zawng hian player 10 hmachhawn turin striker pakhat a hmang. A dawihzep vanga hun harsa tak an hmachhawn mek chu tlai hnuhnawhah siam ṭhat a tum a, extra time khelh a ṭul ta tho.
Extra time-ah Silva handball vanga penalty chu Eden Hazard-a'n petin keeper Salvatore Sirigu a bum a, minute 96-naah 2-1 a ni.
Chelsea keeper Courtois-a'n corner aṭanga ball kal ṭha takin a dang zet a, a vawi hnihna erawh a dang thei lo. Penalty chawitu Brazilian defender Silva-a'n ṭha zetin minute 114-naah a tauh lut a, captain Silva-a'n quarterfinal-ah PSG a hruai thleng.
PSG manager Laurent Blanc chuan, "Ka player-te khan inkhelh ṭan aṭanga a tawp thlengin an khel ṭha tluan chhuak a ni. First leg leh second leg kha dik takin thlir kir ila, quarterfinal lut phu zawk kan ni. Kan player-te khan tlem zawk ni chunga an talbuai kha a mak ka ti," tiin a sawi.
PSG goal hmasa zawk khungtu Luiz hi Chelsea tan vawi 143 zet a khel hman a, nikum khan PSG-in pound maktaduai 40-in an lei chhuak. Brazilian defender chuan, "Goal ka khung chuan ka lawm miah lo ang ka ti lawk vek a, amaherawhchu ka lawm em a ni. Chelsea supporter-te hriatthiamna ka ngen e," tiin a sawi.
Result Kimchang
Chelsea 2 - 2 PSG
Che : Cahill 81'; Hazard 96'(P)
PSG : Luiz 86'; Silva 114'
Agg 3 - 3 : Away Goal Rule-in PSG an chak