Duckenfield-a inpuang

Hillsborough chhiatna a match commander David Duckenfield chuan kha chhiatna rap­thlak tak chungchangah khan dawt a sawi thu court hmaah a puang.

Duckenfield chuan, "Kha chhiatna rapthlak tak thlen chhan dik tak kha min an hre vek a ni. Fans leh Police-te pawhin gate hawngtu kha fan-te ni loin keini police lam zawk hi kan ni tih an hre vek. Ka thih ni thlengin kha dawt thu vang khan ka inchhir dawn a ni, " a ti.

Fan-te vang a lo ni si lo

Hillsborough chhiatna thlen chhan kha fan te'n gate an nekchhiat leh lawnliam vang nia sawi a ni ṭhin a, hei hi Duckenfield-a'n khatih laia FA hotupa Graham Kelly hnena a report dan a ni. Mahse, tunah amah Duckenfield vekin gate hawngtu chu Police zawk an nih thu a puang leh ta si a ni.

FA Cup 1989 semifinal-a venhimna lam hotupa Duck­enfield chuan, "Kha chhiatna rapthlak tak avanga nunna chan ta mi 96 chhungte hnenah khan a leh chuang awm tawh lo tur khawpa inchhirna nen ngaihdam ka dil a ni," a ti.

Hmanhmawh luat vanga dawt sawi Duckenfield Hillsborough chhiatna chhuitu judge Christina Lambert-i'n, "Kha thil thleng chungchangah khan i thil sawi leh sawi lohah dikhlel awmin i hria em? FA hotute tana hriatthiam loh tur thil sawi te i nei em? tia a zawhna chu Duckenfield chuan, "Hre tehreng mai ka pi, kha thil thlen dan dik tak kha ka hrilh lo a ni," a ti a ni.

Duckenfield chuan sawi chhunzawmin, "Kha thil thleng thut khan min ṭhawng em em a, khatiang laka ruahmanna siam dan tur kha 'zirtir' ka ni lo hrim hrim bawk. Engmah chhuanlam siam ṭulin ka hre lo, keimah vanga kha chhiatna kha thleng a ni," a ti.

Liverpool fans 96 laiin nunna an channa-a mawhphurtu Duckenfield chuan engvanga dawt sawi mai nge a nih a hriat loh thu sawiin, "Thil thleng khan min ṭhawng em em a, ka rilru chi ai leh buai vel khan hmanhmawh takin fan ho thiltihah ka puh ta mai ni berin ka hria. A tuartu te tana a nat tur zia leh hrehawm tur zia ka lo ngaihtuah phak lo a ni," a ti.

Gate hawn chhan chu

Duckenfield chuan gate an hawn chhan chu 'a pu' te'n gate hawng tura thu an pek vang niin a sawi. Khatih laia Superintendent of Police Roger Marshall chuan fans pungkhawm tam lutuk vang chuan gate hawng mai tura a tih thu a sawi a ni.

Match commander David Duckenfield chuan, "Ka ngaihtuahna chuan gate hi hawng ta ila, heng mipui zozai hi khawnge an kal ang? tiin ka ngaihtuah a, mah se chutih lai chuan Marshall khan police radio aṭanga min rawn be lehin , 'Gate kan hawn loh chuan an thi mai ang,' tiin min rawn hrilh leh a ni," a ti.

Duckenfield chuan a rilru a buai thu leh a inngaihtuah nasat thu sawiin police duty ve tho Bernard Murray chuan, "Gate chu kan hawng dawn ta em?" tia a zawh thu a sawi.

Kum 70-a upa Duckenfield chuan, "Murray-a hnenah chuan 'Murray gate kan hawn loh vanga mi an thih dawn ai chuan gate chu hawng mai rawh' tiin thu ka pe ta a ni," tiin thutlukna siamtu a nih thu a sawi.