Allianz Arena-ah goal a sur

Nilaini zan khan Allianz Arena-ah Cham­pions League last 16 second leg khelh a ni a, Bayern Munich-in an mikhual Shakhtar Donetsk 7-0 in an sawp.

Ukraine-ah goal awm loa an inhnehtawk avangin quarterfinal lut turin Ba­yern-in goal thun an ma­mawh a, an ma­mawh ang ngeiin minute 90 chhungin goal sarih zet an thun. German champion hian inkhelh ṭan tirha Shakhtar defender Olexandr Kucher hnawhchhuah an hlawk pui hle.

Ball an pet e

Bayern-in an nawr nghal a, Mario Gotze tih­tluk vangin Kucher chu hnawh chhuah a ni a, penalty a chawi bawk. Minute thumna lekah Thomas Muller-a'n penalty aṭangin goal hmahruai a khung nghal.

Bayern-in inkhel an thunun chhunzawm nghal a, Shakhtar player-te an chhah buai hneh hle. Robert Lewandowsk-a'n a hun ṭha a bawhpelh hnuah defender Jerome Boateng chuan minute 34-ah an goal hnih na a thun. First half-ah bayern in ball an chang tam hle a goal shot pawh vawi 15 zet an nei hman. Shakhtar lam hian ṭum khat chauh goal khung tumin an pet ve thei a ni.

Second half-ah Bayern an ropui zia an lantir chhunzawm zel a, minute li chauh an la khel leh hman tihah Franck Ribery chuan box veilam sir aṭangin mawi takin a pet goal nghal. Minute 50 an khel tling chiah, Muller chuan chuan goal dinglam kilah a thlawh lut zui leh zat a, Bayern-in 4-0 in hma an hruai.

French forward Ribery chu inhliam vangin lakchhuah a ni a, a aiah hian Juan Bernat dah luh a ni. Bayern goal nawr a nep phah chuang lo. Rafinha corner pet chu minute 63-naah defender Holger Badstuber chuan a tauh goal ve leh. Minute 75-ah midfielder Bastian Schweinsteiger chuan through ball ṭha tak mai Robert Lewandowski tan a pe a, ani hian goal-ah a chantir chiang hle.

German champion-in duhtawk an la hmu lo cheu, Gotze-a'n minute87-naah goal sarihna a khung a, 7-0 in an chak.

Ngaihnawm

Shakhtar defender Olexandr Kucher chu minute hnih leh second 39-naah hnawhchhuah a ni a, Champions League-a red card hmu rang ber a ni.

Bayern hian ball possession 74% zet changin inkhel an thunun hneh hle. An khingpui Shaktar lam hian Bayern goalkeeper Manuel Neuer tan hna hautak vawi khat mah an siam lo mai ni loin goal zawnah vawi khat mah an pet lo a ni.

Bayern hian tunhnai season nga chhungin Champions League final ṭum thum an thleng thei a, 2010 leh 2012-ah te a vanduai zawkah ṭang mah se 2013 khan an champion a ni. Season 11 chhungin quarter final vawi riat an thlenna chiah a ni bawk.

Germany international Muller hian Champions League-ah goal 26 a khung tawh a, German zingah ani aia khung tam an awm lo.

Eng nge an sawi

Bayern Munich coach Pep Guardiola chuan, "Ka player-te chungah rinna ka nghat a, beiseina sang tak ka nei bawk. Chu chu zaninah khan a takin kan hmu a, ka beiseina an tih hlawhtling chiang hle a ni. Shakhtar lam khan player 10-a an khelh avang khan a harsa ang tih chu ka ring mah se a pumpui a sawi chuan ka naute khan an khel ṭha thlawt a ni," tiin a naute chu uar takin a fak.

Shakhtar manager Mircea Lucescu chuan, "Inkhel harsa tak a ni dawn tih kha chu kan hre lawk a, mahse khatiang em em kha chu kan beisei lo. Bayern te ang team ṭha tum chuan player 10 a khelh chu a harsa ṭhin a ni. Kan khel ṭha tawk lo a, goal thun turin chakna kan neih loh bakah kan goal pawh kan veng thei ngang lo," tiin a sawi.