Player thar nen England an inlan dawn?

UEFA Nations League khelh hun a her chhuak leh ta a, football khawvela a thiam ber an nih loh lai pawha ngaihven hlawh pawl ni reng England chu zanin dar 9:30 hian an inlan dawn. 

England hmachhawn tur team hi Three Lions ang lo taka star player sawi tur ngah lo Iceland an ni a, mahse he team hian European team ṭha ber ber pawh barakhaih turin theihna an nei. 

Chutihrual chuan zanin England team hi Wayne Rooney, Steven Gerarrd leh Frank Lampard-te vanglaia 'golden generation' anga star player an ngah vanga ngaihven hlawh an ni bik lo a, player beiseiawm tak tak an inlan dawn vang a ni. 

Gareth Southgate-a'n ram tana la inlan ngai lo zingah Dean Henderson, Phil Foden, Jack Grealish, Kalvin Phillips, Ainsley Maitland-Niles, Conor Coady leh Mason Greenwood-te a ko a, he team 'thar' hi khawvelin a hmu chak. 

Southgate-a'n si ban nghak turin Jordan Pickford, Nick Pope leh Dean Henderson a ko a, goalkeeper pathum zinga ram tana tawnhriat ngah ber Pickford hian Three Lions tan vawi 24 goal a veng tawh. 

Kum 28 mi Pope hi an zinga upa ber ni mah se ram tan vawi hnih chauh a la inlan a, Everton keeper Pickford aiin tawnhriat a nei tlem zawk. 

Chutihrual chuan Burnley keeper Pope hi season liam taa Premier League Player of the Year nominee zinga lang phak a ni a, Southgate-a'n goal veng turin a chungah rinna a nghat a nih pawhin a mak lo ang. 

Kum 23 mi Dean Henderson-a'n Sheffield United-ah loan-a hun hmangin Chelsea chil ti put khawpin a khel ṭha a, mahse a club dik tak Manchester United-in contract thar pein an thlung nghet - ram tana la inlan ngai lo a nih avangin Nations League-a an match hmasa bera inlan tir chu Southgate-a'n a ngam kher lo mai thei. 

England tlarhnung hi en ila position dang enin tawnhriat nei ṭha player an kawl hnemna ber a ni. Mual vei lam sirah City defender hlui Kyle Walker a awm a rinawm a, a laiah Michael Keane leh Joe Gomez awmin Trent Alexander-Arnold chu right back-a khel tura ngaih a ni. 

Tlarhnunga England tana la inlan lo awmchhun Conor Coady pawh hi dah hniam theih a ni lo. Liverpool youth system chhuak defender hi Wolverhampton Wanderers captain ni thei a ni a, ram tana a match hmasa ber khelhtir a nih pawhin a zam lo ang. 

England midfield-a koh player pasarihin ram tana an khelh tawh zat belhkhawm chu 15 a ni a, tawnhriat an nei tlem hle - mahse ram tana la inlan lo Foden, Grealish, Maitland-Niles leh Phillips-te hi Three Lions tana an tawnhriat aṭanga teh chi an ni lo a, season liam taa an inkhel en te chuan player ṭha bik an ni tih an hai lo ang. 

Kum 24 mi Kalvin Phillips hi England squad-a top flight football khel lo awmchhun a ni a, season hman zawh takah khan Leeds United tan a khel - a hming lemah 'Yorkshire Pirlo' an tih avangin a thiam ang tih a chiang. 

England squad pumpui thlirin tlarhma hi an ngaihtuahawm lohna lai ber niin a lang a, Raheem Sterling, Harry Kane, Jadon Sancho, Tammy Abraham, Danny Ings leh Mason Greenwood-te ho an kawl avangin ram tana inkhelh chawlhsan tawn Premier League top scorer Jamie Vardy pawh an ngai lutuk lo ang. 

Season liam taah khan England tlarhma player zingah hian inelna hrang hranga goal 20 khung tling lo chu Abraham (18 goals) leh Greenwood (17) chauh an ni a, anni pahnih goal khung zat pawh hi ram tam tak tan chuan thlamuanpui tham a ni. 

England squad awm dan thlirin Southgate-a'n 4-1-4-1 a hman a rinawm a, tlarhmaah Harry Kane luhtir niin Sterling leh Sancho ten an thlawp a rinawm a, Mount leh Foden ten midfield lai an luahlum ang. 

Rice chu defensive midfield role neitu niin tlarhnung pui tura dah a nih a rinawm a, tlarhnungah hian Walker, Keane, Gomez leh Trent te khelin Pope chu si ban nghak tura ngaih a ni. 

England ṭantu te chuan Euro 2016, round of 16-a Iceland nena an intawn ṭum kha an la theihnghilh lo ang. Mipui nuai thum chuang awrh chenna Iceland hian England beiseina chu chhu chatin an thawn haw a nih kha.

Three Lions tan Wayne Rooney chuan penalty chhuih lutin goal hmahruai khung mah se Iceland-in Ragnar Sigurdsson leh Kolbeinn Sigthorsson hmangin an chhang let a, a tawpah 2-1 in an chak. 

England laka goal hnuhnung zawk khungtu Sigthorsson hi Iceland squad-ah a la awm a, ram tan match 57-a khelha goal 26 khung thei striker hian inkhel bul a ṭan a nih chuan England tlarhnung tan ngaihthah a thiang lo ang. 

Ram tana vawi 84 inlan thei midfielder Birkir Bjarnason leh ram tana vawi 83 inlan tawh defender Kari Arnason-ten Iceland an la ho thei dawn a, an tawnhriat ringawt pawh England hneh nan a ṭangkai pha dawn. 

England tana a vawi khat nana koh Coady chuan, "Ka nupui nen ka chhungte hnenah chanchin hlimawm kan neih thu kan sawi a, ka nupui a rai leh emaw an ti a ni," tiin ram tana khel tura koh a nih boruak a sawi. 

Goalkeepers: Dean Henderson, Jordan Pickford, Nick Pope.

Defenders: Trent Alexander-Arnold, Conor Coady, Eric Dier, Joe Gomez, Michael Keane, Ainsley Maitland-Niles, Tyrone Mings, Kieran Trippier, Kyle Walker.

Midfielders: Phil Foden, Mason Mount, Kalvin Phillips, Declan Rice, James Ward-Prowse, Harry Winks.

Forwards: Tammy Abraham, Mason Greenwood, Danny Ings, Harry Kane, Marcus Rashford, Jadon Sancho, Raheem Sterling.