South Africa-in last eight an lut

South Africa chuan nimin khan ICC World Cup 2015 quarter-final an lut chiang ta a, UAE chu run 146 in an hneh a ni.

WestpacTrust Sta­dium, Wellington-a in­khelah hian South Africa tan captain AB De Villiers bawk a che ṭha leh a, run 99 a team tan a hlapchhuah mai bakah wicket hnih a la tel bawk a ni.

Ṭhumvawra vannei zawk UAE in vawm hma­sak an thlang a, an thlang fuh lo. South Africa in over 50-ah mi paruk chiah an hloh a, run 341 an vawchhuak thei. UAE tan South Africa laka heti zat run um hi a huphurhawm hle.

UAE in over 47.3 bak an tlin lo. An vaia out vekin run 195 an tlin thei hram a ni. UAE tana che ṭha ber Swapnil Patil a khel ṭha a, ball 100 a hmachhawnah run 57 vawchhuakin a tawp thleng a dam. Bowling lamah Mohammad Naveed a che ṭha bawk a, wicket thum a la. mahse, an ṭhiante'n an thlawp ṭhat tawk loh avangin South Africa meuh chu an ngam ta chuang lo a ni.

South Africa hi vawi ruk khelhah vawi li chak tawhin Pool B-ah pahnihna dinhmun an hauh mek a, an chung chiaha awm vawi nga khelha vawi nga chak thei India nen quarter-final an lut chiang tawh a ni. UAE erawh vawi nga khelhah vawi khatmah chak hmel an la hmu ve lo thung.