Mizoram leh final inkarah Punjab

Santosh Trophy champion lai Mizoramin final thleng turin a thlengtu Punjab an hneh a ngai a, chu chu thil hautak tak a ni ang.

Vawiin tlai dar 2:30 hian Guru Nanak Stadium, Ludhiana-ah semifinal hnuhnung zawk khelh a ni dawn a, final hi March 15, Pathiannia khelh tur a ni.

National Games-ah Mizoram-in Punjab ṭum hnih an hneh a, pumruaah Punjab an lian zawk. Groupstage-ah Mizoram 2-0 in an chak a, a khel ṭha zawk leh chak phu zawk a ni. Final-ah Punjab-in goal khung theihna chance ṭha an ngah mah se 1-0 in Mizoram an chak.

National Games-a Mizoram player-te leh Santosh Trophy khelte hi an hrang hlak a, Punjab hi an inlak belh nual bawk - hei vang hian National Games nen sawi zawm theih a ni lo.

Mizoram coach H Vanlalthlanga chuan, "A tir aṭangin kan nawr nghal ang. Insual dawn a, dawh nghal tawpte chu a fuh ngai hleinem," tiin uang pahin an khelh dan tur a sawi.

Thutak zuiin Mizoram coach chuan, "Football-ah chuan chetsual theih a ni. Amaherawhchu Jalandhar aiin Ludhiana-a ground hi a fuh zawkin ka hria. Jalandhar kha chu a tawi hret a, innawr let a awl avangin chetsual a awlsam. Tuna kan khelhna tur erawh a dung a sei hret avangin pet deuh nalh nalh a ngai ang. Chetsual a har hret dawn tihna a ni," a ti.

Mizoram coach hian Vanglaini palai hnehah player luh theih dan a sawi a, starting eleven erawh a la chian loh thu a sawi thung.

Lalruatthara, Ronald Zothanzama, Lalrinzuala leh Johny Lalfakzuala te'n yellow card an hmu tawh a, Punjab laka an hmuh leh chuan final-ah an inlan thei dawn lo.

Goalkeeper-ah Lalawmpuia a awm ang a, tlar hnung erawh a chiang lo. Defence laiah Ruatthara leh Lalrinchhana a inkawp thei a, right back-ah Ronald emaw Rinzuala emaw thlan theih a ni a, left back-ah Lallawmzuala hman theih a ni.

Midfield laiah captain Samson Rameng­mawia, V. Lalṭanpuia leh Johny-te inkarah duhthlan tur a awm a, wing-ah Lalbiakhlua leh H. Lalmuankima-te an luh a rinawm.

Forward-ah goal hnih khung tawh F. Lalrinpuia a lut chiang ang a; a kawppui turin Joseph Lalnunpuia, Zico Zoremsanga leh Malsawmfela-te an awm a, a lut tur chu coach thlan tur a ni.

TV lamah inkhel kan en thei dawn lo niin a lang. Kum 2013-ah quarter final aṭangin Doordharshan-ah a en theih a, kum 2014-ah semi final atangin, kumin hi permission an hmu thei lo niin organiser lamin an sawi.