Vawiin tlaiah Zarkawt leh Mission Veng

Samsung 3:16 Plan Solution Mizoram Super League-ah a sang ber champion a ni tawp lo. Final a awm dawn avangin vawiin tlai dar 4:00-a pahnihna Zarkawt BCA leh pathumna Mission Veng Vikings inkhel tur hi a hmuhnawm ang.

Hawla Indoor Stadium-ah mipui ṭhahnem tak an pungkhawm ṭhin a, inelna ṭan tirh lama supporter nei ṭha loa an sawi Zarkawt BCA-in Khatla TBL an hneh loh ṭumin ṭantu an ngah tih an lantir a, Mission Veng Vikings hi chuan MSL ṭan aṭangin ṭantu an nei chhe ngai lo.

Mission Veng Vikings-in an match hnuhnung berah Chaltlang Ryders 68-61 in an hneh a, vawi thum khelh tawhah vawi hnih chakin vawi khat an tlawm. Vikings tan point 44 score tawhtu Lalrina Renthlei hi an innghahna tur a ni.

Zarkawt BCA erawh chak lo hlim an ni a, an hneh loh erawh Mission Veng Vikings pawhin an ngam bik loh Khatla TBL an ni. An players zingah inhliam vangin Jackson Lalrintluanga leh Albert Lalramchuana te an inlan theih a rinawm loh a, an innghahna ber tur Ramthar tlangval point 46 leh rebound 17 lai neitu Zorinsanga erawh a dam ṭha a, Mission Veng tan ani hi ven ngai tur chu a ni.

Eng nge an sawi?

Zarkawt BCA assistant coach Lalruatfela chuan, "TBL kan hneh loh kha kan ṭhatpui zawk. Kan chak lohna vang khan player-te an ṭang lehzual a, a hma aiin kan ṭha zawk ang," a ti.

Afela chuan khawtlang mipui ṭawiawmna leh veng dang aṭanga anmahni ṭantu te ṭawiawmna chuan a tih lawm thu a sawi a, Vikings an hmachhawn hunah pawh ṭawiawm leh ṭheuh turin a sawm a ni.

Mission Veng Vikings coach Gospel Lalchhandama chuan, "BCA hi keini aia an ṭhat zawkna ka hmu lo, a pawimawh ber chu combination a ni. Keini pawh hi inzir lai mek tho kan ni a, kan zir anga kan khelh theih a ṭul a ni," a ti.

A dinhmun chungchang sawiin Ch.D-a chuan, "Pathumna kan nih avangin kan khel ṭha ta viau tihna a ni lo. Match 10 khelh tur a la awm a, tuna a mawngphaha awm pawh hian final an la thleng daih thei. Pahnihna nih tum luat vangin pressure kan nei lo. Vengchhung aṭangin ṭawiawmna ṭha tak kan hmu a, wheelchair nena kan inkhel en ṭhin an awm avangin ka lawm takzet a ni," tiin a sawi.