Hmahruaitu leh a mawngphah

Samsung 3:16 Plan Solution Mizoram Super League chu zanin hian Hawla Indoor Stadium-ah khelh a ni leh dawn a, dar 8:00-ah Chaltlang Ryders leh Khatla TBL te an in vawm luh siak leh ang.

Chak loh la nei lo Khatla TBL hian an record duhawm tak hi chhawm nun zel an tum ngei ang a, chak ni hmel la hmu lo Chaltlang Ryders lamin an record duhawm lo tak thai reh an tum thung ang.

Chaltlang lam tan hian Ramhlun North tlangval Lalmuanpuia Zote a pawimawh leh hle tura ngaih a ni. Ani hian MSL-ah point 70 zet a score tawh a, an team innghanana leh thiampuipa a ni. Ryders guard Mapuia hian ṭawi­awmna a mamawh a, Ramhlun South tlangval Lalremtluanga leh K. Lalbiakzuala te an chet fuh a pawimawh.

Khatla TBL lamah chuan mimal ai chuan team pum a chetṭhat leh a pawimawh ang. Chutih rualin Dawrpui Vengthar tlangval Vanlalmuana leh Saron veng tlangval H. Laldinsanga te an pawimawh leh tura ngaih a ni. A tawi zawngin zanin inkhel tur hi Mapuia leh Mapuia te inelna a ni thei a, chutihrualin TBL Ma­puia a lut tam lo thei bawk.

Eng nge an sawi?

Ryders assistant coach Marc chuan, "Kan khelh tur TBL hi team ṭha tak an ni a, mahse anni dang tur hian kan inzir a, kan dan theih ngei ka beisei. Zanin hian kan vanduai palh anih pawhin second leg aṭang chuan kan danglam tawh ang. Kan player ṭhenkhat te inhliam leh exam avangin kan chhawr thei loh bakah, kan player pawimawh David-a chu thil pawimawh avangin first leg-ah hian a khel thei lo a, karleh aṭang chuan

ṭha zawkin kan khelh theih ka beisei," tiin a sawi.

TBL assistant coach Lana chuan, "Kan khing­pui tur Chaltlang Ryders hi kan huphurh hran lo a, mahse game boruak a san ṭhin em avangin chesual ve thei tho kan ni, chuvangin kan fimkhur hle ang. Player naupang zawkte tan hun siam sak kan tum ang," tiin a sawi.