Footballer-te an mal dawn lo

Santosh Trophy hi Pun­jab-a khelh a ni nachungin Mizoram team-in group stage-ah phaia Mizote hnen aṭangin ṭawiawmna an dawng ṭha hle. Vawiina Ludhiana-a semifinal khelh hunah a danglam dawn lo - Ludhiana, Jalandhar, Chan­digarh bakah Delhi-a Mizo awm te'n an ṭawiawm dawn.

Inkhelhna tur hmun Ludhiana-ah Mizo an ṭhahnem lo a, 10 chuang awrh chauh awm mah se a awmchhun erawh an kal ṭha dawn.

Jalandhar an inpeih

Jalandhar Mizo Zirlai Pawl vice president Lallunghnema Tuallawt chuan, "Exam kan zawh tawh avangin kan phur tawh khawp mai. Flag te deuh te, lian deuhte leh banner-te kan siam belh a, 80 vel lai chuan Mizoram team hi kan ṭawiawm theih ka ring. Inkhelh hun hi kan nghakhlel tawh a ni," tiin a huhoa inkhel en ngei an tum thu a sawi.

Jalandhar aṭanga Ludhiana hi 60 km bawr vel a ni a, bus-in darkar khat leh a chanve kal vel a ni.

Chandigarh an phur

Chandigarh Mizo Union president Benjamin Lalsangliana chuan, "Kan phur khawp mai, he lamah chuan Santosh Trophy hlir kan sawi. Whatsapp group kan nei a, chutah pawh chuan Mizoram inkhel tur bak sawi tur kan hre lo. Football tui vak lo nia ka lo ngaihte pawh Mizoram tan chuan ke pen an hreh lo khawp mai. Khuang leh banner nen Ludhiana pan kan tum," a ti.

Chandigarh aṭanga Ludhiana hi 100 km vel a ni a, bus-in darkar hnih vel kal a ni. Chandigarh Mizote hian Jalandhar-a group stage khelh a nih aṭang khan Mizoram football team hi an ṭawiawm ṭha hle.