Arsenal leh Merino inrem

Mikel Arteta-a'n club dang player chungchang a sawi duh loh thu sawi mah se, khawthlang chanchinbu rintlakte chuan Arsenal leh Mikel Merino an inrem tawh niin an tarlang a, kar leh lamah chuan inremna an ziah fel hman a rinawm.

Gunner hian Real Sociedad midfielder hi an hel rei ta hle - Spain international man zat hi pound maktaduai 32.6 thlenga sang chho thei tur a ni dawn a, a hlawma pek nghal vek tur erawh a ni dawn lo thung.

Kum 28 mi Merino hian la Liga club tan tun season tawp thleng daih bak contract a nei tawh lo, nakkum nipui bazar hunah a thlawna chhuah tir ngawt ai chuan man neia hralh theih chu Real Sociedad tan thil ṭha a ni.

Arsenal hian tun nipuiah goalkeeper David Raya an langhet tawh a, defender Riccardo Calafiori an la fel tawh bawk. Hetih lai hian an striker Eddie Nketiah chuan Nottingham Forest a zawm hnai ve hle thung.