Khelh loh an pawm thiam a ṭul - Ten Hag

Manchester United chuan vawiin tlai dar 5:00 hian Amex Stadium-ah Brighton & Hove Albion an hmachhawn dawn. Seagulls hian an match hmasa berah Everton chu khualmualah 3-0 in an sawp a, Erik Ten Hag-a hote lakah an inringtawk khawp ang.

Dutch manager Ten Hag chuan, "Transfer zawh hunah position tinah player pahnih zel awm se ka duh a, chumi awm zia chu awl an awm a ṭul dawn. Khelh loh an pawm thiam a ṭul. Player 11-in a champion thei lo a, squad neih ṭhat a ngai.

"Nakkum May thlaa champion tur zawn a nih dawn chauh a, chumi hma zawng chuan player zawng zawng an inpeih vek a ṭul ni," tiin position tina player inel tur dah a tum thu a sawi.

Man United boss Ten Hag chuan sawi chhunzawmin, "Player-te chunga kan beiseina ka sawi lo a, ka sawi hi club-in player-te chunga kan phut a ni. Mimal aiin team hi a pawimawh zel," a ti.

Season liam taa loan hmanga Borussia Dortmund tana ṭha taka khel Jadon Sancho hmalam hun a chiang lo. English winger Sancho hi Community Shield-ah inlan mah se Fulham nen tun season-a Premier League match hmasa ber an khelh ṭumin squad-ah a awm lo. Dutch manager Ten Hag-a'n Brighton laka a chhawr danin Sancho hmalam hun tur a hril thei ang.

Man United hian PSG midfielder Manu Ugarte an dawr mek a, an hlawhtling hnai niin a lang a, defensive midfielder an ngai pawimawh hle. Ten Hag-a hote hian kum 2006-a piang Mali international Sekou Kone chu Guidars FC aṭangin an lalut dawn a, ani pawh hi defensive midfielder a ni.

Kone man hi £1m chauh niin a chet ṭhat dan a zirin a man hi a pung chho thei ang. Chutihrualin Brighton an hmachhawn hunah erawh Fulham laka chakna goal khungtu Joshua Zirkzee chu mit fukna tur a ni dawn.

Ten Hag-a hoten Cottagers lakah harsa takin hnehna an chang a, Seagulls laka hnehna chan a awlsam dawn lo. Brighton hi Fabian Hurzeler-a enkawl an ni a, kum 31 mi chauh ni mah se kum 2016 aṭang khan coach hna hi a lo chelh ṭan tawh.

Hurzeler hnuaiah Brighton-in bul an ṭan ṭha a, Everton lakah Kaoru Mitoma, Danny Welbeck leh Simon Adingra ten goal khat ṭheuh an khung. Seagulls hi Man United tlarhnung fiahna ṭha tak a ni thei ang.