Sinner kawng a hautak dawn

US Open khelh hun a hnai a, an inhmachhawn theih dan tur tih chhuah a ni tawh - world number 1 Jannik Sinner kalkawng a hautak dawn hle niin a lang, a match hmasa berah erawh seeded ni phak lo Mackenzie McDonald a hmachhawn ang.

Italian tlangval Sinner hi a kaltluang zel a nih chuan, quarterfinal-ah Daniil Medvedev a hmachhawn thei dawn - Russian star hi a hneh a nih pawhin semifinal-ah Carlos Alcaraz nen an la inhmachhawn thei dawn bawk.

Medvedev leh Alcaraz te hian tun hmain US Open nomawi an lo chawi ve ve tawh a, New York khawpuia inelna lianah hian Sinner aiin sulhnu an nei ṭha tihna a ni, an kalkawng lam aṭanga final lut thei nih hi a hlu dawn hle.

Inhmachhawn thei langsar dang zingah final lut tawh pahnih - Alexander Zverev (2020) leh Casper Ruud (2022) te an tel a, anni pahnih hi quarterfinal-ah an intum thei dawn, final kalkawngah champion lai Novak Djokovic a awm bawk ang.

Serbian star Djokovic-a'n Paris Olympic gold medal a vuak chhuah hnuah tournament a khel leh dawn chiah a, a kalkawngah Montreal Masters title latu Alexei Popyrin a tum thei dawn, fimkhur a ngai hle ang.