Manchester City-ah Gundogan a kir ta

Manchester City chuan club captain hlui Ilkay Gundogan chu Barcelona aṭangin an la kir ta a, kum khat atan contract ziahpuiin, kum khat dang pawhsei theihna dan a awm tel.

Pep Guardiola-a'n kum 2016-a City a enkawl khan a player lakluh hmasak ber chu Gundogan hi a ni a, pound maktaduai 20-in Borussia Dortmund aṭangin an la, match 304-ah goal 60 khungin, assist vawi 38 a nei a, nomawi 14 ngawt a chawi zui.

2022-23 season khan a contract hmang zoin City hi a chhuahsan a, Barca chu free transfer-in a zawm. Catalan club tan match 51 khelin, goal nga a khung bakah assist vawi 14 a nei.

Barca-ah Gundogan che ṭha mah se, Dani Olmo an lakluh chu sum dinhmun avangin Catalan club hian an ziak lut thei lo a, an player hlawh hnem zinga mi German midfielder hi an chhuahtir a ṭul.

Gundogan chuan, "City-a kum sarih hun ka hman kha, khelmual chhung leh pawnah hlimna leh lawmnain a khat a, mi zawng zawngin Pep ka zahzia pawh an hria. Khawvela manager ṭha ber a ni a, a bula ni tin training chuan player ṭha zawkah min siam a ni - City kawr hak leh ka châk tawh hle," a ti.

Kum 33 mi midfielder hian a club hlui Barca thlah zuiin, "Club-in harsatna a tawh avangin ka chhuak a, ka chhuah avanga club sum dinhmun a pangngai dawn a nih chuan ka lungngaihna pawh a zia deuh e," a ti a, Barca-a thla 12 hun a hmang thei chu a lawm thu a sawi bawk.

City hian an league match hmasa berah Chelsea chu 2-0 in an hneh a, an league match hnihnaah zanin dar 7:30 hian Ipswich Town an mikhual ang.