Kan ṭha tawk e - Arne Slot

Liverpool-in nipui transfer-ah player lakluh an la nei lo a, Premier League club 20 zingah tun season-a player thar la nei lo awmchhun an ni - mahse, coach thar Arne Slot chuan player thar la lut lo pawha an ṭhat tawk thu a sawi.

Slot chuan, "Transfer chungchangah hi chuan ka chhanna tur inhre lawk vekin ka ring. Player lakluh kan neih chuan inhre em em dawn - player dang chungchang kan sawi ve ngai lo.

"Player lakluh kan nei rih lo a ni mai a, he team hi ka ringtawk a ni. A hma pawhin ka sawi tawh a, team ṭha tak, naupang ṭha tak takin an chawih mawi ka chhawm a ni. An chungah rinna ka nghat a, rintlak an nihzia pawh an pholang tawh," a ti.

Liverpool hian pre-season ṭha tak an hman hnuin, an league match hmasa berah Ipswich Town chu 2-0 in league match hmasa berah an hneh a, Pathianni zan dar 9:00 hian league match hnihna khel turin Anfield-ah Brentford an mikhual zui ang.

Jurgen Klopp thlaktu Slot chuan, "Ka ngaih dan chuan kawng dik kan zawh mek. Hetihrual hian player ṭhenkhat hi chu kan zingah kar thum bak an la awm hman lo tih inhriat ve a ṭul. Keimahni chauh ni loin, kan khingpui tur pawh ngaihven tel an ṭul ṭhin.

"Ipswich kha khelh an harsa khawp a, mahse, hmun awl kan insiam theih hnua ka naute khelh ṭhatzia chu inhmuh kha. Hnathawh tur tam tak a la awm a, hei chu a bul ṭanna chauh a ni," a ti.

Slot chuan sawi chhunzawmin, "Ka player-te hi ni tin, a mimal ang leh team anga an khelh dan ka la zir reng. Kar hmasa khan kan match-a khel ve lo player-ten training hmasa berah an tih ṭhatzia ka zir chhuak. Kha kha club tan a ṭha a ni.

"Ka player-te kiangah thil thar ka la zir reng a, kar thum chauh kan la awm ho avangin hei erawh thil awm ve tak a ni," tiin a sawi.