Goal ruk khung thei Mizoram Police

LZ Juice MPL11-ah I Day Football champion Mizoram Police-in an ṭha tak tak tih an pholang a, nimin chhun khan Sihphir Venghlun FC chu 6-0 in an sawp. Police tan hian Michael Lalbiaksanga, FC Lalhmunmawia, F. Lallawmkima, Malsawmfela, Lalruatpuia leh Isaac Malsawmkima ten goal khat ṭheuh an khung.

Lalbiaksanga Colney hote hi MPL champion lai an ni a, champion nawn an tum tih khelmuala an chet dan aṭangin an lantir a, a sang pali zingah an inhlang chho leh ta. Mizoram Police-in game mawi an khel a, goal ruk an khung bakah goal an chhuah lo.

Goal 3 phawt

I Day Football-ah Michael Lalbiaksanga best player a ni a, Tlangmawi rawlthar hi a buai phah lo - boruak a ngam phah zawk. Inkhelh ṭan aṭanga minute lina lekah veilam aṭanga Isaac-a ball pek chu Michael-a hian goal-ah a chantir nghal.

Mizoram Police-in goal an khung hma avangin Sihphir Venghlun an zuai nghal a, BS-a Colney hoten inkhel an thunun hneh hle. Minute 25-naah H. Lalbiakthanga freekick chu FC-a'n a tauh lut a, Sairang Dinthar tlangval hian MPL-ah Police tana a goal hmasa ber a khung a, I Day Football final-ah a khung tawh bawk.

Minute 37-naah Malsawmfela'n goal-ah ṭha takin a hlap a, Sihphir Venghlun goalkeper Lalhruaizela dan per chu F. Lallawmkima'n a tauh goal. Police vanneih ṭum ni se goal tam zawk khung thei tur an ni a, first half tawp hma chiah pawhin Sawmfela ball fing chu Michael-a'n um lutin keeper chauh a hmachhawn hnuah a khung lo.

Goal 3 dang

Second half-ah pawh inkhel kalhmang a danglam lo a, Police bawk an chungnung. Minute 49-naah corner kick aṭanga ball kal chu FC-a'n tauhin goalkeeper Hruaia'n a dang per a, Sawmfela'n goal-ah a chantir.

Police player-ten inrintawkna an nei zel a, minute 54-naah right back Ruatpuia'n box chhungah hun thawl neiin kawh zetin goal kilah a pet lut. Goal rukna lut turin hun rei nghah a ngai lo a, minute 63-naah Police-in freekick hmang ṭangkaiin box chhung buai nuai kara Lalnunsanga (Talea) pet chu keeper Hruaia'n dang mah se a per chu Isaac-a'n goal-ah a khung ta tho.

Coach BS-a'n goal ruk an khung hnuah player a thlak kual a, Police chungnung chhunzawm mah se goal chance an nei ta bik lo. Chutihrualin FC-a leh Lalhmunmawia (Ahmuntea) te an inkawp rem chho zel a, goalkeeper F. Lalmuanawma a inlan theih bawk avangin Police tlarhnung a phui ta hle.

Engtin zel?

Police hi match hmasa pangaaah vawi thum an chak lo a, vawi hnih chak bawk mah se goal 10 an chhuah tlin tawh avangin champion nawn beiseina a hniam hman hle. Mahse, I Day Football zawhah erawh Police thar an ni a, MPL champion lai tan nomawi humhim hi thil theih a ni leh tawh.

Coach BS-a'n Police ṭhat dan ber a hre chho a, starting eleven 11-ah civil player panga Michael, Lawma, FC-a, Isaac leh Lalrodawngkima te an awm. An civil player-te zarah kum upa leh kum naupang an inpawlh ṭha a, awmze neia team rem khawmtu coaching staff-ten fak an phu hle.