Bethlehem lakah AFC an inhrosa

Aizawl FC-in I Day Football final-ah Mizoram Police an hneh lo a, I League club an tlusawp lo - an tho chhuak lehnghal. Nimin tlai khan Victor Lalbiakmawia hoten FC Bethlehem lakah goal chhuah hmasa mah se 6-1 in an sawp.

I League club hian match ruk aṭangin point 14 an hmu tawh a, hmahruaitu Chanmari FC an phak lohna chu point hnih chauh a ni. Tun season aṭangin league champion tan lawmman a awm dawn a, Aizawl FC leh Chanmari FC ten an inchuh dawn niin a lang.

RG Stadium-a inkhelah FC Bethelehemin goal venhim tumin tlarhnung an rem phui a, coach Lalhriatpuia Sailo hoten bul an ṭan ṭha - Varun Raj Tamang hmangin minute 16-naah goal an khung hmasa zawk hial.

Aizawl FC-in Bethlehem tlarhnung an su hawng thei lo a, I League club an buai hman. Mahse, Lalruatthara'n hla takin aṭangin ṭha zetin a pet goal a, tlarhnung rem phui ṭha Bethlehem tan pawh dah ngaihna a awm lo.

Ruatthara'n kawng a siam hnuah AFC an inringtawk a, Fela Hlawndo freekick duhthusam chu defender Laltlanhlua'n ṭha zetin a tauh goal a, first half-ah 2-1 a ni. I League club-in second half-ah inkhel an thunun zui a, Bethlehemin point beiseia goal nawr an tum avangin an tlarhnung a pawp zui hle.

Aizawl FC-in second half ṭan aṭanga minute thum pawh tling loah Laltlanzova hmangin an khung belh a; C. Lalhriatpuia, Peter Lalrinhlua leh Lalchhawnkima ten goal khat ṭheuh an khung belh. Bethlehemin goal khungna remchang nei bawk mah se team ṭha zawk Aizawl FC 6-1 in an chak.