Belgium tan Courtois khel dawn rih lo

Real Madrid goalkeeper Thibaut Courtois chuan Belgium coach atan Domenico Tedesco hman a nih chhung chu ram tan inlan a tum tawh loh thu a sawi a, Belgium fans tam tak chuan an coach hi chhuak turin an duh zawk phah hial mai thei!

Kum 32 mi Courtois hi June 2023 khan Tedesco nen hian an inhmu thiam lo a, Euro 2024 qualifier an khelh mekah squad a chhuahsan phah hial. Tedesco hian Courtois chu Estonia laka captain armband hren tir a tum loh avanga titauah a puh a, Courtois erawhin a hliam vanga squad chhuahsan a nih thu a sawi thung.

Belgium tana match 102 khel tawh Courtois leh an coach inkar hi a ṭha lo chhunzawm a, tun thlengin an la inrem lo. Season hmasa khan Courtois hi khup hliam vangin vawi hnih a buai a, season tawp lamah dam ṭhain Champions League final pawh a khel - heti chung hian Euro-ah erawh hruai a ni lo.

Real keeper chuan, "Coach nena kan inkar boruakte uluk taka ka ngaihtuah hnuah, a kaihhruaina hnuaia inkhel tawh lo turin thutlukna ka siam a ni. He thil thlengah hian mawhphurtu ka nih vena pawh ka pawm a, a chungah rinna nghat tawh lo mah ila, boruak tichhe zawnga awm erawh ka tum lo.

"Belgium football federation nen pawh hemi chungchangah hian inbiakna kan nei a, ka dinhmun min hriatthiampui avangin he thutlukna harsa tak hi ka siam a ni. Keimah vanga lunghnur fans ṭhenkhat chungah ngaihdam ka dil a, mahse, he thutlukna hian team chhung buaina chingfelin, Belgium pawhin a tumte tihlawhtling turin hmalam a pan thei dawn a ni," a ti.

Euro 2024-ah khan Belgium hian last 16 lut mah se, France ngam loin an tla a, Al Qadsiah goalkeeper Koen Casteels chuan heng match liah te hian bul a ṭan vek a ni.