Chelsea an chak, hmabak Wolves

Chelsea-in lawmna tur an nei ta. Ningani zan khan Europa Conference League playoff-ah Swiss club Servette chu 2-0 in an hneh. Blues tan hian Christopher Nkunku leh Noni Madueke ten goal an khung a, an goal an venghim bawk.

London club hian Europa Conference League khelh turin second leg an khelh leh phawt a ṭul a, August 29, Ningani zanah Servette khelmual Stade de Geneve-ah an inkhel leh ang.

Chutihrualin Swiss club hneh hi Chelsea tan inchhuanna tur a la ni lo. August 25, Pathianni hian Chelsea-in Molineux Stadium-ah Wolves an mikhual dawn a, Enzo Maresca hote dinhmun fiahna tur a ni thei ang.

Chak vawi 1-na

Chelsea coach Enzo Maresca-a'n Manchester City an hneh loh ṭuma inkhel bul ṭantu aṭangin Nkunku leh Moisés Caicedo te chauh bul a ṭan nawn tir a, a bak zawng a thlak vek. Inkhelh hmain Raheem Sterling leh Ben Chilwell te tan hmun a awm loh thu a sawi bawk.

Khelmual pawnah player ngah uchuak avangin Chelsea-in nuihzat an hlawh a, mahse khelmual chhungah hnehna an chan miau avangin an nui ve thei ta.

Chutihrualin Swiss club lakah Chelsea-in goal an khung lawk lo a, second half minute 50-naah Nkunku-a'n a penalty hlawhchhuah chu goal-ah a chantir. Minute 76-naah substitute Madueke-a'n kawh zetin a khung leh bawk.

Chelsea hi goal khat aia tam khung thei ni mah se kum 18 mi Marc Guiu-a'n goal ruaka chhal theihah a pet goal lo a, 2-0 an lungawi a ṭul. Maresca hnuaia an chakna hmasa ber a ni bawk.

Tum dan mumal

Chelsea hian team kalpui dan mumal an nei lo ang hiala ngaitu an nei a, chutihrualin Maresca erawhin a naute zingah rin a nei tih a lang ṭan. Match hnuhnung ber aṭangin player pakua ngawt thlak mah se substitute aṭanga lut player panga Enzo Fernandez, Cole Palmer, Malo Gusto leh Romeo Lavia te chu City laka bul ṭantu vek an ni.

Blues khingpui Servette hi an nem deuh avangin Maresca-a'n player enchhin nan a hmangah a ngaih theih a, Wolves an hmachhawn hunah an ṭhat dan bera hriatin a rem leh tawh a rinawm.

Wolves aṭanga £54m-a Chelsea zawmtu Portugal forward Pedro Neto a khel ṭha a, coach Maresca tan pawh ngaihtuahna sen belh tur a awm dawn. Blues hian Joao Felix an lak belh leh tawh bawk a, Maresca-a'n tlarhmaa duh thlan tur a ngah leh sawt.