Bundesliga an ṭan ta - tu nge champion dawn?

European football-a league ngaihven hlawh zinga mi Bundesliga chu nizan khan khelh ṭan a ni a, champion lai Bayer Leverkusen leh Borussia Mönchengladbach te an inkhel a, result kan hre hman lo.

Hetihlai hian German football rei tak thununtu Bayern Munich chu Pathianni zan dar 7:00-ah an inlan dawn a, khualmualah Wolfsburg an lenchilh ang - Vincent Kompany hoin season thar an hmachhawn dawn a, en an châkawm tawh hle.

Champion beisei zinga mi Borussia Dortmund chu zanin dar 10:00 hian an inlan dawn a, an player hlui Nuri Sahin kaihhruaina hnuaia season hmachhawn tur team hian Eintracht Frankfurt an mikhual ang.

Leverkusen, Bayern leh Dortmund an langsar a, an pathum sawi nghing thei club an awm a nih chuan RB Leipzig an ni. German club ṭhangduang hi zanin dar 7:00-ah an inlan dawn a, VfL Bochum an mikhual dawn.

Hei le Leverkusen

Season hmasa khan Leverkusen-in hun tawp lama goal khung an chin chu an ṭhatpui hle - inelna hrang hrangah minute 90 hnu lama goal khung kha vawi 17 aia tlem lo an nei a, tun season-ah pawh hei hi an chhunzawm lehnghal.

German Super Cup-ah khan player pakhata an tlem zawk chungin minute 88-naah si phurh sutna goal an khung leh hram a, penalty-a VfB Stuttgart hneh zuiin nomawi nen season bul an ṭan. Tun season-ah Xabi Alonso hoa an hnathawh chhunzawm an tum leh dawn.

Leverkusen vanneihna chu an player ṭha an chân lo hi a ni. Coach Alonso berin club lian sawmna hnar a, cham a thlan takah chuan player pawimawh Florian Wirtz, Granit Xhaka, Jeremie Frimpong leh Alex Grimaldo ten cham an thlang vek a, Bayern pan thei dinhmuna ding Jonathan Tah pawh a la chhuak lo.

German champion hian an neih sa an chelh bakah squad an thuam chak bawk a, Girona aṭangin midfielder Aleix Garcia, Rennes defender Jeanuel Belocian leh Rennes winger Martin Terrier te an neih belh bawk - champion nawn an tum ang.

Bayern thar chu

Bundesliga-ah Bayern-in vawi 33 zet nomawi an chawi tawh a, anni aia champion hnem an awm lo - season hmasaa tlawm nei loa Leverkusen an champion hma khan a zawnin league-ah vawi 11 an champion a, an sulhnu a ṭha hle.

Leverkusen-in an lalṭhutthleng phet thla a, an luahlan takah chuan insiam danglam an tum nghal a, coach atan Kompany an la lut. Mahse, Manchester City captain hlui hi season hmasa lawka Premier League aṭanga Burnley relegate puitu a nih avangin fans tam takin rin an harsat.

Mahse, pre-season leh DFB-Pokal lama an match hmasa berah Kompany a che chhe lo a, possession-based football khel ṭhin a nihna chu Bayern nen hian inmil thlap tura ngaih a ni - nomawi a chawi lo ang tih a sawi theih loh.

Bayern hian nipui transfer-ah season hmasaa lak an tum tawh Joao Palhinha chu Fulham aṭangin an la ta nge nge a, Crystal Palace aṭangin winger Michael Olise an la bawk. German football-ah rorel leh ngei an tum a, Harry Kane telna team hi an ṭha tawk bawk.

Dortmund hi

Season hmasaah Dortmund-in Champions League final an lut a, mahse, inelna hrang hranga an season hman danah club thuneitute an lawm tawk lo - table-ah pangana an ni hram a, Bundesliga-in hmun ruak panga an neih tak avangin Champions League an khel phak ta hram.

Hei vang hian coach Edin Terzic pawhin Dortmund mangṭhain a puanthuah a tel a, a aiah club player hlui Nuri Sahin chu ruat a ni. Real Madrid leh Liverpool tan pawha lo khel tawh player hian Turkish club Antalyaspor a lo enkawl tawh tih loh chu coach angin sulhnu hraw a nei lo.

Mahse, Sahin hian possession-based chu a football kalpui dan niin, hei hi Leverkusen leh Bayern an tlan khalh theihna turah Dortmund thuneitute chuan an ngai a, nipui transfer-ah player ṭha an lakluh nual bawk avangin an inringtawk ang.

Dortmund hian Germany international pathum Pascal Gross (Brighton & Hove Albion), Waldemar Anton (VfB Stuttgart) leh Maximilian Beier (Hoffenheim) an la lut a, Manchester City aṭangin full back Yan Couto chu loan-a hawhin, season hmasa Bundesliga-a goal 28 khungtu Serhou Guirassy chu Stuttgart aṭangin an seng lut bawk.

Leipzig beiseina

Season hman zawh takah palina ni chungin season an khar a, RB Leipzig hi dah hniam theih an ni lo - 2009-10 season-ah German fifth division-ah he club hian bul an ṭan a, mahse, hma an sawn chak rem rem hle.

Bundesliga-ah season kua a zawna an khelhna tur a ni der tawh. Nomawi la chawi lo mah se, vawi hnih chu pahnihna an ni tawh a, DFB-Pokal nomawi vawi hnih an chawi tawh bawk. Anni aia top flight league-a hun hmang rei tawh zawk tam tak tih theih loh a ni.

Leipzig hi RB Salzburg, Borussia Mönchengladbach leh Dortmund coach hlui Marco Rose hnuaiah an khel a, Bundesliga hrechiangtu coach a ni. Nipui transfer-ah an player langsar Dani Olmo an chân a, hlauhthawn phah nan erawh an hmang lo ang.

Leipzig hian goalkeeper Maarten Vandevoordt (Genk), midfielder Assan Ouédraogo (Schalke 04) leh Antonio Nusa (Club Brugge) an la lut a, Paris Saint-Germain aṭangin Xavi Simons chu season zawn atan loan-in an hawh bawk - Leverkusen pawh an champion theih chuan champion ve theih an inring ang.