Bernabeu-ah Mbappe a inlan dawn

Boruak nei hata Real Madrid pantu Kylian Mbappe chuan Pathianni zan dar 8:30 hian Santiago Bernabeu-a a match hmasa ber a khel dawn a, Real hian league match-ah Real Valladolid an mikhual ang - mipui mit fukna tur chu Mbappe bawk a ni.

Real hian thawm nei na tak chungin UEFA Super Cup nomawi an chawi tawh a, mahse, an league match hmasa berah Real Mallorca chu 1-1 in an inhnehtawkpui - an vanneih ṭum ni lo se, tlawm thei dinhmunah an ding zawk hial.

Spanish champion tan Mbappe bakah Jude Bellingham, Vinicius Jr leh Rodrygo ten bul an ṭan vek a, squad en mai chuan Mallorca laka chak zo lo tur chu an ni lo!

Hei vang hian inkhelh zawhah coach Carlo Ancelotti pawh a lungawi lo a, a naute na takin a hau. Italian coach ropui chuan, "Kha aia ṭha zawka khel tur kha kan ni a, kan rilru puthmang pawh kan thlak a ngai.

"Kan inkhairual tawk lo a, chuvang chuan kan chak zo lo. Game chhe tak a ni - goal nawr ṭhin team kan ni a, kan game kan siamna kawnga pawimawh tak chu tlarhnung a ni tih kan theihnghilh tur a ni lo," a ti a, a lawm lo hle.

Ancelotti chuan sawi zawmin, "Defending hi tlarhnung chauhin an tih tur a ni lo a, kan vaia tih tur a ni. Chutiang hrethiam player an tam chuan game a awlsam sawt ṭhin a, hei hi game-a pawimawh ber a ni tih hre lo tan erawh buaina thlentu a ni," a ti!

Real leh Mallorca inkhelah khan, chawlhlawk laiin Bellingham-a'n an tlarhma Mbappe, Vinicius leh Rodrygo te a fuih lai hmuh tur awm. English midfielder hian, "Goal-in nawr chuan a hmawr bawk ṭhin rawh u. Ball-in hloh chuan um let a, chuhsak a har tawh ṭhin," tiin a hau.

Hei hi Mbappe chuan chhangin, "A dik lutuk, chuvang alawm a hmawr kan bawk a ṭul ka tih..." tiin a chhang a, zaninah chuan French striker hian Real fan-te lawmna thlen turin goal khung ngei a tum ang.