Spurs legend nih duh Son-a

Son Heung-min chuan Tottenham Hotspur tan hun rei tak khelh a duh - North London club legend nih a duh, a thu sawi hi Spurs ṭantute tan chuan chanchin lawmawm a ni ngei ang.

Kum 32 mi Son-a hian Premier League bikah season 10 a khel tling dawn ta a, inelna hrang hrangah Spurs tan hian match 409 khelin goal 162 a khungsak tawh, sulhnu a nei ṭha hle.

South Korea international Son chuan, "Team pakhat tana kum 10 chhung hun hman chu thil ṭha tak niah ka ngai. Tun hma lama ka sawi tawh ang khan Spurs hi champion pui ka duh a, he club legend tia an sawi theih tur nih ka duh.

"Tun dinhmunah chuan Spurs legend tia sawi theih ka la ni lo, eng emaw berah tal ka champion pui phawt a ngai," a ti. Spurs hian kum 2008 khan League Cup an la a, a hnu lamah an la champion leh lo.

Son hian season hmasa khan Premier League goal 17 a khung a, a team hi table-ah pangana a nih pui. Son chuan, "Hmasawn zel ka duh a, chutihrualin thlen chin tur bik bituk ka nei hran ngai lo, a sang leh ṭha thei ang bera khelh hi ka tum dan a ni," a ti.

Tottenham hi tun season an league match hmasa berah Leicester City nen 1-1 in an inhnehtawk, zanin dar 7:30 hian Everton an mikhual ang.