Rafael Leao a chhuak lo ang - Milan CEO

AC Milan CEO Giorgio Furlani chuan an player duh lai Rafael Leao chu hralh tumna an nei lo tih a sawi - Leao hi Barcelona chuan lakluh tumin an lo hel ve reng a ni.

Furlani chuan, "A chhuak lo ang, a chhuak dawn lo tih hi 100% ka chiang," a ti a, chanchinbu mi ten i chiang takzet maw? tia an zawhna pawh, ''Tehreng mai" tiin a chhang leh bawk.

Portuguese forward Rafael Leao hi Milan tana player pawimawh leh ṭangkai berte zinga mi a ni mek a, kum 25 mi chauh la niin hmabak êng tak a nei, season hmasa khan Serie A match 34 aṭangin goal kua a khung.

Italian club tana Leao contract neih lai hi kum 2028 thleng daih a ni mek a, lei chhuak tur chuan sum sen huai ve pawh a ngaiin a rinawm. Spanish chanchinbu mite chuan Barca nen an sawizawi fo a ni.

Furlani thusawi aṭanga a lan dan chuan Rafael Leao hi a chhuak dawn rih lo a, season tir aṭangin Milan rinrawl a ni leh ang. Milan hian an match hmasaah Torino 2-2 in an inhnehtawkpui, point hnih an hloh nghal.

Zanin dar 10:00 hian Parma an lenchilh dawn a, manager thar Paulo Fonseca leh a naute hian point thum hlawh chhuah ngei tumin thapui an thawh ang.