Intlansiak vawi 200 hmachhawn tur Verstappen

Pathianni zan dar 6:30 hian Formula Dutch Grand Prix an tlan dawn a, driver champion lai Max Verstappen chuan a vawi 200 nan F1 intlansiak a hmachhawn dawn, hetiang dinhmun luah thei naupang ber a ni ang.

Dutch tlangval Verstappen hi kum 26 mi chauh a la ni a, a kum la tlem mah se tawnhriat a ngah tawh hle. Red Bull driver chuan, "Season chanve kan hmang zo a, tunah chuan a chawhnu lam bul kan ṭan leh dawn ta.

"Hun rei lote chhungin intlansiak vawi 200 ka hmachhawn tling ve dawn ta der mai, a hlu dawn hle a ni," a ti. Max hi season khata intlansiak tam duh lo zinga mi a ni a, tih tlem lam duhtu zawk a ni.

Car intlansiakna sang berah hian tumahin intlansiak vawi 400 an la hmachhawn tling ngai lo. Tun kar tawp hian Fernando Alonso chu a vawi 395 nan a tlan dawn - Aston Martin driver hi kum 43 mi a ni tawh hial.

A zawna vawi thum champion thei Verstappen hian mite la tih theih ngai loh tih a duh ṭhin, chutihrualin intlansiak tam lama pakhatna nih erawh a ngaihtuah phak rih lo tih a sawi thung.

Red Bull hian Verstappen an duhsak a, duhsak tlakin a che ṭha ṭhin bawk. Season tir lam khan a teammate Sergio Perez a che ṭha tawk lo, mahse Red Bull chuan Perez chungah rinna nghat zuiin, an chhawr zui zel rih dawn a ni.