Ronaldo dinhmun a chiang lo

Pathianni zan dar 12:15-ah UEFA Nations League champion lai Portugal chuan World Cup 2018 finalist Croatia an mikhual dawn a, Cristiano Ronaldo inlan theih dawn leh dawn loh a chiang lo. 

Ronaldo hi squad-ah koh ni mah se a ke zungpuiah hliam a neih avangin Nilaini leh Ningani kha chuan club training a zawm lo a, Portuguese Football Federation (FPF) chuan an player chhuanvawr hian a hrana gym lamah training a neih thu an sawi. 

Ram tana vawi 164 inlana goal 99 khung thei Ronaldo tel lo chuan Portugal team hi an danglam sawt dawn tih a chiang a, FPF lam hian he thu buatsaih thleng hian a inlan ngei dawn leh dawn loh an la sawi thei lo. 

Portugal hian Lille midfielder Renato Sanches chu dam loh avangin squad aṭangin a chhuah an phalsak bawk a, Bayern Munich player hlui dam lohna hi eng ang chiah nge a nih sawi a ni lo. 

Hetihlai hian Croatia an kim thei dawn bik lo - UEFA Nations League khel tur squad-ah hian an player pawimawh Luka Modric leh Ivan Rakitic-te chu chawlh hahdamna hun pek duh vangin an telh lo a, an player ṭangkai pahnih tel loin Portugal leh France an hmachhawn a ngai dawn a ni.