Andy Murray zin kawng a tawp

US Open khelh laia mipui ngaihven hlawh Andy Murray chu second round paltlang zo loin a tla. Nimin zing inkhelah Murray hi Felix Auger-Aliassime lakah darkar hnih leh minute sarih chhungin 6-2, 6-3, 6-4 in a chak lo.

Kum 20 mi Auger Aliassime hian 2016 US Open-ah khan 'Boys Title' a lo la tawh, tunah chuan world number 21 a ni tawh a, senior huangah pawh a kawlhrawng hle - a match lehpekah chuan Dan Evans leh Corentin Moutet inkhela chak zawk a hmachhawn dawn.

Mipa singles champion tura rinkai zinga mi Dominic Thiem-a'n harsatna nei loin Sumit Nagal a hneh a, inkhel dangah Wimbledon finalist hlui Milos Raonic erawh rinkai lo zawk Vasek Pospisil lakah a tlawm thung.

Flushing Meadows, New York-a stadium hmingthang Arthur Ashe Stadium-ah Murray a inlan leh, a match hmasa lama set hnih a hloh hnua a thawh chhuah lehna ang kha a thlen nawn tir thei ta lo a ni.

Kum 33 mi Murray a che rang tawk lo a, a chet danah a chau tih a lang bawk. Canadian rawlthar Auger-Aliassime-a'n a service ṭha tak leh chet ranna hmangin a khingpui a chaih a ni ber - Britain tlangval service hi vawi li a chhuhsak laiin, break point pawh a hmuh tir ve lo.

Ruah sur vangin Ashe Stadium chung khuhna hman a ngai a, boruak lum uap tak karah pawh Auger-Aliassime a talbuai duh lo. A ball vuak natna hmangin vawi 52 zet winners a vaw chhuak, Murray erawhin vawi kua chauh a nei thung.

Australian Open 2019 hnua a vawi khat nan Murray-a'n Grand Slam a khel leh, US Open-ah hian 2012 khan hlawhtlinna a lo chan tawh avang leh hliam dam hlim a nih avangin mipui ngaihven a hlawh, a tum ram thleng zo lo mah se match hautak a khel leh thei tawh tih a lantir.

World number 1 hlui Murray chuan, "A ball vuak a nain a service hmasa ber a hlauhawm thei hle, ka lo vuak fuh ṭum pawhin ka duhna hmunah ka vaw let thei ṭhin lo. A service ṭha tak khan a tan inkhelh a tih awlsam phah laiin ka tan a harsat phah thung.

"Ka taksa lamah chuan harsatna lian ka nei lo, ka mamawh zawk chu tournament leh match khelh hnem a ni. Ngaiawh leh tur chuan court chhungah ka awm tam a ngai," a ti. First round-ah set nga an khel a, an inkhelh zawhah hahchawlh a mamawh thu a lo sawi tawh.

US Open inbuatsaihna Western & Southern Open lama khel ṭha pangngai tak Milos Raonic chu amah ang bawka Canadian tlangval Vasek Pospisil lakah 6-7 (1-7), 6-3, 7-6 (7-4), 6-3 in a chak lo. Raonic hian kar hmasa khan Andy Murray a hneh a, beiseina nei sang mah se inelna lianah beisei a phak lo.

World number 94 Pospisil hian a match lehpekah chuan seeded pariatna Roberto Bautista Agut a hmachhawn ang. Spanish tlangval hian inkhel dangah Serbian player Miomir Kecmanovic chu 6-3, 3-6, 6-3, 6-4 in a lo hneh ve bawk.

Season hmasa finalist Daniil Medvedev-a'n Christopher O'Connell 6-3, 6-2, 6-4 in a hneh a, nikum lama semifinal kheltu Grigor Dimitrov pawhin Marton Fucsovics chu  6-7 (5-7), 7-6 (7-4), 3-6, 6-4, 6-1 in a hneh hram. Frances Tiafoe leh Matteo Berrettini te pawhin round sang zawk an inhlangkai.