Covid-19 vangin France squad-ah Pogba a tel lo

Manchester United midfielder Paul Pogba chuan coronavirus a kai tih hriatchhuah a nih hnuah UEFA Nations League khel tur France squad-ah telh a ni lo. 

Pogba-a'n ram tana match a khel thei lo tur hi Rennes midfielder Eduardo Camavinga lawmah a tla a, kum 17 mi rawlthar hi Pogba hmun ruak luah turin koh a ni. United chuan thuchhuah siamin, "United chhungkua chuan season lo awm tur atan Pogba hian damna a chan vat theih nan duhsakna kan hlan a ni," an ti a, an player chu dam thuai turin duhsakna an hlan. 

France manager Didier Deschamps chuan, "Engkim peihfel vek a nih tawh hnuah thutlukna thar siam leh a ngaih phah a ni," tiin Pogba-a'n Covid-19 a kai tih an hriatchhuah tlai thu a sawi. 

Kum 27 mi Pogba hi ni 14 chu a inkhunghrang phawt dawn a, France team tan UEFA Nations League khel thei dawn lo mah se Manchester United league match hmasa berah erawh a inlan thei ang. 

Premier League hi September 12-ah khelh ṭan tur a ni a, United hian September 19-ah an match hmasa ber an khel dawn - Old Trafford-ah Crystal Palace an mikhual dawn a ni. 

Pogba hian hliam vangin season hmasa khan match a khel tam tawk lo a, mahse Covid-19 vanga league pawhsei a nih hnuah rawn dam lehin United-in league-a pathumna dinhmun an luah nan a thawh hlawk hle. France international hian season hman zawh takah khan United tan league match 16 chiah a khel a, goal khat khungin assist vawi li a nei thei a ni.

France hian September 5 zanah Sweden an lenchilh ang a, ni thum hnuah World Cup 2018 final-a an lo hneh tawh hnu Croatia chu an mualah an mikhual leh bawk ang. 

Mahse, UEFA Nations League match pawimawh pahnihah hian Pogba a tel thei dawn ta lo a, coach Deschamps chuan, "Pogba hi a tirah chuan ka list-ah a awm ngei a, mahse nimin lama test kan neih hnuah vawiinah a result kan hria a, a lo positive si a ni," tiin Ningani zan khan a sawi. 

Pogba hian France tan match 69 khelin goal 10-a khungsak tawh a, kum 2018-a World Cup nomawi chawi team-ah khan a tel - Deschamps-a hnuaiah France tan hmun pawimawh a 

chang ṭhin. Juventus midfielder hlui Pogba aiawh tura koh Eduardo Camavinga hi kum 17 mi chauh a la ni a, France Under 21 tan vawi khat a inlan tawh tih loh chu international football-ah chhuan tur a nei lo. 

Rennes youth system chhuak Eduardo Camavinga hian amah chher liantu club tan Ligue 1-a khel mek a, December 2018 khan club tan a professional contract hmasa ber a ziak. 

Hetihlai hian kum 16 leh thla khat mi a ni a, club tana professional contract ziak thei naupang ber a ni - April, 2019-ah club tan a match hmasa ber chu Angers lakah a khel a, Rennes tana inlan thei naupang ber a ni bawk. Real Madrid nena sawi zawm hlawh mek player hi Sweden leh Croatia lakah a inlan thei a nih chuan indopui pahnihna hnua kum tling lo (kum 17 leh thla kua) chunga France tana inlan thei hmasa ber a ni ang a, 2000 hnu lama piang zinga Les Bleus (France sawina) tana inlan thei hmasa ber a ni bawk ang. 

Deschamps chuan, "Ram tana khel tura inkoh nan chuan a la hma mah mah a ni mai thei a, mahse khelmuala a hnathawhte hi hmuh hmaih theih a ni si lo. Rennes tan khelmuala a awm leh awm loh a hriat ṭhin hle a ni," tiin Camavinga a koh chhan a sawi. 

France squad-ah hian ram tana inlan tura a vawi khat nana koh dang pahnih an la awm a, Champions League semifinal-a an team an hruai thlen rah sengin Lyon midfielder Houssem Aouar leh RB Leipzig defender Dayot Upamecano-te chu koh an ni. 

Arsenal leh Liverpool nena sawizawm hlawh mek Aouar hian season hman zawh takah khan Lyon tan inelna hrang hrangah match 41 khelin goal kua a khung a, assist vawi 10 a nei bawk - kum 22 chauh a la ni. Deschamps chuan, "An thiamna hian min hneh a ni. Ball a thiam a, ṭhiante khung tur a siamsak thei a, a khung thei bawk. A khel ṭha tluang em em reng a, attacking midfielder, khelmual lai emaw a sirah pawh khel thei a ni," a ti. 

Kum 21 mi Upamecano hi Champions League quarterfinal-a Diego Costa-a 'dah ṭhat' avangin hriat a hlawh lehzual a, Deschamps chuan, "Champions League-a a hnathawh enin tun hi koh hun niin ka hria a, a kutah engkim a innghat tawh," tiin a defender chuan France jersey ha turin theihna a neih thu a sawi. 

–––––––––––––––––––––––––––––––––––

Goalkeepers: Hugo Lloris (Tottenham Hotspur), Mike Maignan (Lille), Steve Mandanda (Marseille)

Defenders: Lucas Hernandez (Bayern Munich), Léo Dubois (Lyon), Presnel Kimpembe (PSG), Clément Lenglet (FC Barcelona), Dayot Upamecano (RB Leipzig), Raphaël Varane (Real Madrid), Lucas Digne (Everton), Ferland Mendy (Real Madrid)

Midfielders: Moussa Sissoko (Tottenham Hotspur), Houssem Aouar (Lyon), Steven Nzonzi (Rennes), Eduardo Camavinga (Rennes), Adrien Rabiot (Juventus), N’Golo Kanté (Chelsea)

Forwards: Olivier Giroud (Chelsea), Wissam Ben Yedder (AS Monaco), Kylian Mbappé (PSG), Antoine Griezmann (FC Barcelona), Anthony Martial (Manchester United), Jonathan Ikoné (Lille)

–––––––––––––––––––––––––––––––––––