India tlangval Nagal a tla

Sumit Nagal tan Dominic Thiem a la ṭha mah mah. Indian tennis player zinga US Open khel phal awmchhun hi second round-ah Thiem ngam loin a tla, darkar khat leh minute 59 chhungin 6-3, 6-3, 6-2 in a tlawm.

India number 1 Nagal hian tun kartir lam khan beisei loh takin first round-ah hnehna a lo chang tawh, season sarih chhunga India player zingah Grand Slam singles match a hnehna chang thei hmasa ber a ni, a zinkawng erawh a zawh thui thei lo.

Kum 23 mi Nagal chuan, "Inkhel hautak tak a ni, a nihna takah chuan kan theihna san zawng a inthlau deuh a ni. Tawnhriat a ngah tawh zawkin hun pawimawh laia point hmuh dan tur a hre thei hle, inelna sangah chuan holam taka tih sual neih a pawizia ka zir chhuak," a ti.

Season hmasa khan Nagal hian US Open hi a lo khel phak tawh bawk a, a match hmasa berah Roger Federer nen an inkhelh avangin hriat a hlawh phah. Delhi tlangval hi junior huangah chuan Mizo tlangval Basil L Khuma te nena inkhelho tawh ṭhin a ni.

Nagal hnehtu Thiem-a'n a kum 27 tlin champha chu hnehna nen a lawm thung. Austrian tlangval hi seeded pahnihna niin, a match lehpekah 2014 champion Marin Cilic a hmachhawn ang. Cilic hian inkhel dangah Norbert Gombos chu 6-3, 1-6, 7-6 (7-2), 7-5 in a hneh.