Constantine-a hnuaiah India an chak nghal
Ningani zan khan India chuan a mikhual Nepal chu Indira Gandhi Athletic Stadium, Guwahati-ah Sunil Chhetri goal hnih thun hmangin 2-0 in a hneh. India coach Stephen Constantine-a'n India team ṭum hnih a enkawlna game hmasa berah a chak pui nghal a ni.
FIFA 2018 World Cup qualifiers round 1 first leg-ah hian Mizo tlangval Lalrindika Ralte pawh India tan a inlan. Hnahthial tlangval Jeje Lalpekhlua erawh a hliam la dam chian loh vang in a inlan lo. India hian March 17 khian Nepal khawpui Kathmandu-ah second leg an khel leh ang.
India hi coach thar Constantine-a hnuaiah an phur tih an game aṭangin a hriat theih a, inkhel pawh an thunun. First half-ah India in goal khung lo mah se striker Robin Singh a hlauhawm thei hle. Goal khungna hun ṭha hmu mah se Nepal goalkeeper Limbu Kiran a su tlang zo lo. Lunglei tlangval Didika'n first half tawp hma hret in Robin Singh tan ball duhthusam a siamsak a, mah se India striker hian goal ngei tura ngaihah a pet goal lo.
Second half-ah India in inkhel an thunun chhunzawm a, minute 53na-ah striker Sunil Chhetri chuan a ke veilam hmangin Nepal goal veilam sirah a thun.
India-in goal an neih hnu-in Didika lakchhuah a ni a, minute 57-naah Royal Wahingdoh player Jackichand Singh-a'n a rawn thlak. Minute 69-naah goal hmahruai khung tu Chhetri bawk kan hmu leh a, a ke dinglam in goal dinglam kilah thlawh lut lehin a team te 2-0 in a chak pui ta a ni.
India midfielder Didika, chuan,"Coach thar Constantine-a'n long ball pet tam tur in min ti a, chuvangin striker pasang Robin Singh-a tan ball kan pe nasa a ni. Long ball khelh hi ka tan chuan insiam rem a harsa rih deuh," tiin a sawi a, coach nen an inkar boruak a ṭhat thu a sawi bawk.
Khelhna hmun la chang rih lo Jeje chuan, "100% in ka la fit loh avang in hmun ka la chang thei rih lo, tunah chuan ka hliam a dam tawh a, training ka zawm leh thei tawh ringawt pawh hi ka lawm hle," tiin a sawi.