Rakesh kir zanah Tuikual S chak

Ningani zan Hawla Indoor Stadium-ah thawm a ṭha a, Tuikual South mipuiin an team an au chak.

Tuikual South-ah playoff an champion ṭuma player pawimawh, Rakesh Sangwan hmuh tur a awm leh tawh a, Samsung 3:16 Plan Solution Mizoram Super League-a a game hmasa berah a team te chak hmela rawn hmuhpui nghal. Tuikual South hian 56-52 in hnehna an chang.

Tuikual South-in Zarkawt team pakhat zawk Zarkawt BCA an hneh lo tawh a, a zawna Zarkawt team hneh loh an tum lo. Mahse, Zarkawt Serpents-in inkhel bul an ṭan ṭha zawk a, player-te an in man tawn hle.

Zarkawt Serpents-in tawnhriat ngah loh an tuar a, Haryana tlangval Rakesh-a rawn tlan luh hnuah an chi ai a, an game pangngai an hloh. Tuikual South-in an tawnhriat neih chhawr ṭangkaiin an veng mipui auh phurna nasa tak hnuaiah chak zawkah an ṭang ta a ni.

Tuikual South-in an pasang Rakesh Sangwan an chawr ṭangkai a, MSL a khelh hmasak berah a lut rei lo chungin rebounds 12 zet a rawn nei nghal. Tawnhriat nei ṭha pahnih Vanchuangpuia leh captain F.Zodinthara te team tan an dan pangngai angin an ṭangkai a, points 12 ve ve an hlawhchhuak a, Chp-a'n rebounds 11 zet a nei bawk.

Zarkawt Serpents-in an player pawimawh Lalrinzuala Hnamte inhliam vangin an chhawr thei lo a, Rinzuala tel loh hi an tuar tih an game-ah a lang.

Tuikual South coach KC Lallian­tluanga chuan, "Ka rin aiin kan khel ṭha lo, game hmasa lamah uiawm tak a chak loh vawi hnih kan lo nei tawh a, kha khan player-te a ti ṭang ulh ni berin ka hria. Rakesh khan rei lote a rawn khel chungin a khel ṭha takzet a, a rawn thlen chauh deuh avangin kan la dim rih mai mai zawk a ni," a ti.

KC-a chuan vengchhung mipui ṭawiawmna chuan a tih phur takzet thu sawiin, "Tuikual South mipuiin min ṭawiawmna aia ṭawiawmna ṭha zawk hi a awm thei tawh chuang lo. An chungah kan lawm takzet a ni," a ti.