Mapuia Cricket League 2015 a ngaihnawm

Mizorama cricket inelna ngaihhlut Mapuia Cricket League(MCL) 2015 chu group match tawp lam an hnaih ta. Nimin khan table chung ber inchuhnaah Chanmarians Cricket Club chuan Armed Veng Cricket Club chu wicket 8-in an hneh a, he result hian table chung bera an dinhmun a sawh nghet a, Armed Veng erawh vawiina inkhel result-a zirin an dinhmun a chiang chauh ang.

Batsman-te tana khelh harsat thinna Suaka Cricket Ground (SCG)-ah hian MCL atan bika ground buatsaihtute an fakawm a, tournament dang zawng aiin team-te run siam zat pawh a sang thei hle.

Nimin inkhel

MCL-a khel ṭha pahnih Chanmarians leh Armed Veng-te inhmachhawn tur hian nghahhlelh a hlawh a, hneh loh la nei lo team ve ve an ni a, an khingpuite ve vein an chai thei meuh lo a ni ber. Toss-a vannei Armed Veng-in bat hmasak an thlang.

Armed Veng tan an batsman khel ṭha tluang Lalhmangaiha'n a khel ṭha thawkhat a, ball 34-ah run 39 a vaw chhuak. Midangin thlawp ṭha tawk lo mah se Armed Veng-in over 20 chhungin run 102 siamin wicket ruk an hloh.

Target hi Chanmarians-in umin an opening batsman Michael Lalremkima leh Abhay Joshi-te'n an khel ṭha hle. Michael-a hian ball 39 hmachhawnin run 61 ngawt a vaw chhuak a, a kawppui Abhay pawhin run 30 a vaw chhuak. Michael-a hi a tawp thlengin a out lo a, Abhay hi out mah se Chanmarians tan thil harsa a awm tawh lo a, over 13-ah run 103 siamin wicket 8-in an chak.

Heti hian vawi nga khelha vawi li chaka vawikhat ruahsurin a tihbuai vanga No Result nei Chanmarians chuan point 9 hmuin table-ah pakhatna an ni chiang a, chak lo Armed Veng erawh point 7 hmu tawh mahse vawiin inkhel result-in an dinhmun tur a la hril thui hle ang.

Engtin nge an khelh zel dawn?

MCL-ah hian league table-a a sang ber pahnih-in Qualifier 1 an khel ang a, heta chak zawk hian final lut tlangin a chak lo zawk tan beisei a la bo chuang lo. Pathumna leh palina-in Eliminator an khel ang a, heta chak lo zawk erawh an tla chiang tawh ang a, a chak zawk chu Qualifier 1-a chak lo nen final luh inchuhin Qualifier 2 an khel thung ang.

Tute nge la inkhel dawn?

Vawiin hian table-a pathumnaa awm mek Ramhlun Venglai leh chak la nei lo Zemabawk Pitchers-te dar 9:30-ah an inkhel ang a, chhun dar 12:30-ah table-a palina Chaltlang Sporting Club leh Zarkawt Lords-te an inkhel thung ang.

League match tawp ber turte hi a la pawimawh hle. Ramhlun Venglai hian Zemabawk hi an hneh chuan, an hneh dana zirin table-ah pahnihna an la ni thei a, Zemabawk hian chak nei miah loa tournament hman zawh an duh bik hauh lo ang.

Inkhel hnuhnung ber tur hi a ngaih­nawm hle ang. A chak lo zawk zawk tla tur an ni tawh dawn a, a chak zawk zawk chu table-ah palina niin Eliminator an khel thei ang a, a chak lo zawk team chu entu lama an ṭan a ṭul ve tawh ang.