Pathianni zanah Europe-a khel tur zawnna Manchester United Vs Tottenham
Premier League-a a sang paliin season tharah Champions League an khel dawn a, point 53 hmu tawh Manchester United hi palinaah an awm mek a, paruknaa awm Tottenham Hotspurs nena an inkarah point thum chiah a awm.
Pathianni zan dar 9:30-ah Manchester United leh Tottenham te Old Trafford-ah an inkhel dawn a, inkhel pawimawh tih a chiang a, a hmuhnawm ngei pawh a rinawm.
Mikhual team tana chak harsatna hmun ni ṭhin Old Trafford-ah mikhual tan chak a harsa tawh lo a, Manchester United hi an home game hnuhnung berah Arsenal lakah 2-1 in an tlawm. Pathianni zan hian player manto rualin an khelmualah tlawm nawn an duh lo ang.
Tottenham hi Champions League khelh tum ṭhin, mahse khel pha lo chiah chiahin season an khar fo. Kum tharah hian khelh ngei an tum a nih chuan Champions League khelh tum ve tho United hi an hneh ngei a ṭul tawh.
Team pahnihte hi Premier League-ah bik ṭum 45 an inkhel tawh a, Spurs hi vawi nga chak tawhin United hi vawi 29 an chak tawh thung a ṭum 11 an inhneh tawk bawk. History thlir chuan Tottenham hian an khingpui tur Manchester United hi an tluk lo hle.
Spurs tan hian tun season Premier League-a goal 16 thun tawhtu Harry Kane a pawimawh leh hle ang. Ani hi tunlai English striker duhawm berte zinga mi a ni mek. Manchester tan captain Wayne Rooney hi an innghahna tur a ni leh ang. Rooney hian tun season Premier League-ah goal 10 a thun tawhin an club top scorer a ni.
Pathianni liamta khan United nomawi beisei neih chhun FA Cup chu Arsenal-in an tihtawp sak avangin, kum 1987-1989 hnua a vawi khat nan season hnih a zawn a nomawi chawi thei lo dinhmunah an ding mek.
Tuna an tih theih sang ber kum thara Champions League khelh pawh hi a harsa tawh hlein a rinawm. Spurs nen an inkhelh zawh hian Liverpool, Chelsea, Everton leh Arsenal te an la tum leh dawn a ni.