2018 World Cup aṭangin Zimbabwe hnawtchhuak

Zimbabwe-in an coach hlui Jose Claudinei Georgini hlawh an pek theih loh avangin 2018 FIFA World Cup qualifying khel thei lo turin FIFA-in a hnawtchhuak.

FIFA tarlan danin Zimbabwe Football Association (ZIFA) hnehnah hriatthiamna hun pek an ni a, chutichung chuan an pawisa bat hi an rul thei chuang lo.

ZIFA communications manager Xolisani Gwesela chuan, "Zurich (FIFA hmunpui) lama thuneitute nen kan inbe mek a, thuneitute'n thutlukna an siam tawh avangin khinglet theih loh tihna a ni lo. World Cup khel turin beisei kan la nei fan," a ti.

July thlaa African zone qualifiers fixture draw neih a nih dawn avangin Zimbabwe tan khaw muan theih a ni lo a, October thla aṭangin inkhel ṭan tawh tur a ni.

Brazilian manager Claudinei Georgini hian Jan-Nov, 2008 khan Zimbabwe hi a enkawl a, tun thlengin a hlawh tur $67,000 (£45,000) chu pek a la ni lo.

ZIFA CEO Jonathan Mashingaidze chuan, "Ba nei tho mah ila, World Cup aṭanga paihchhuah kan nih chhan hi ka hrethiam lo. FIFA hnenah pawh ba kan nei tih kan pha lo a, mah se pawisa pek mai tur hi a awm rih lo a ni. Coach hlui Tom Saintfiet leh Sunday Chidzambwa te bakah bank-ah pawisa ba kan la nei bawk," tiin sum lama harsatna an neih mek thu a sawi.