Everton chak zanah Inter an tlawm

Ningani zanah Europa League inkhel hmuhnawm a awm a, Everton-in an khelmual Goodison Park-ah Dynamo Kiev 2-1 a an hneh laiin Inter Milan erawh khualmualah an chak zo lo a, German club VFL Wolfsburg lakah 1-3 in an tlawm.

Record thar nen Lukaku

Goodison Park-ah mi­khual an huangtau hmasa zawk a, kum 31-a upa Dynamo Kiev midfielder Oleg Gusev chuan mikhual tan hmahruaina goal first half-ah a khung a, first half-ah vek Everton tan Steven Naismith chuan a sut.

Goal dang a lut lawk lo. Europe-a English club liante an chet chhiat lai a nih vangin Everton hi an vanduai ve mai dawn emaw tih hnuah khel ṭha em em Romelu Lukaku chuan Everton tan penalty aṭangin goal a rawn khung a, 2-1 in an chak ta a ni.

Belgian striker Lukaku hi a goal khung vang hian Everton tan Europe-a goal khung hnem ber a ni ta a, goal sarih khung tawhin goal ruk khungtu Fred Pickering a lehpel.

Everton boss Roberto Martinez chuan, "Bul ṭan ṭha lo mah ila, minute 20 hnuah khan kan insiam ṭha a, khami hnu kha chuan kan khel ṭha tawh takzet a ni. Dynamo defender te kha an khawng em em mai a, kha khan min tibuai deuh ni berin ka hria. Kan chak avangin kan lawm a, mah se Kiev khawpuiah minute 90 dang kan la inkhelh leh dawn avangin tlang chiang sa kan la ni bik lo," tiin Ukraine khawpuia an inkhelh leh tur chu a thlir lawk.

German club ngam lotu Inter

Inter Milan in khualmualah VFL Wolfs­burg player Kevin De Bruyne an ngam lo a, German club lakah 1-3 in an tlawm.

Inter Milan-in Argentine player Rodrigo Palacio goal hmangin inkhel ṭan aṭanga reilo teah hma hruai mah se an goal-keeper Juan Pablo Carrizo khelh chhiat leh Chelsea duh loh hnu De Bruyne khelh ṭhat an tuar a, kum 23-a upa Belgian winger hian a team tan goal hnih a khung bakah Brazilian defender Naldo goal khung tur a siam sak bawk.

Wolfsburg hi Bundesliga-ah Bayern Munich hnuai chiahah an awm.

Wolfsburg coach Dieter Hecking chuan, "First half-a khel ṭha lo chungin second-half erawh kan khel ṭha takzet a, ka nau te ka chhuang a ni. Hma taka goal an rawn khung avang khan a tir lamah kha chuan kan tan insiam ṭhat leh kha a harsa em em a, mah se zawi zawi a insiam ṭhain kan chak thei ta a ni. Milan-ah kan la zin leh dawn a, quaterfinal lut ngei turin kan theihtawp kan chhuah ang," a ti.

Inter Milan coach Roberto Mancini chuan, "Ball kan chang tam chungin ka naute'n ball an keng ngam tawk lo a, kha kha kan tuar ta a ni," a ti.

A tihsual vanga goal hnihna chhuahtu a keeper Carrizo chu chhanin, "Goal hnihna kha a tihsual chu a ni ngei a, mah se first-half-ah erawh vawi tam tak a dang a ni. Mihring chuan tihsual chang kan nei ṭhin a ni," a ti.