Hamilton intlansiak dawn

US-ah mihang kah a ni a, he buaina hian infiamna lamah pawh nghawng a nei lian leh hle. Lewis Hamilton erawhin chawlh phah a tum lo, tun kar tawpa Formula 1 Belgian Grand Prix an tlan turah a inlan dawn.

Basketball, baseball leh American football ṭhenkhat chu chawlh lailawk a ni a. US-a thil thleng hian Europe pawh a nghawng na a, chutihrualin infiammi zawng zawng tan erawh zawm ve vek theih a ni lem lo. Mercedes driver Hamilton chuan, "Thil thleng tawh dangte nen kan duh lohzia lantir ngei a ngai. Mahse America rama thil thleng a ni a, ka awmna khawmualpuiah engtiang taka lo dawnsawn tur nge tih hriatthiam a har.

"Mi tam tak chuan intluktlanna a awm theih nan hma an la mek zel a, an zingah hian infiammi pawh an ṭhahnem hle. Kei pawhin ka sawi tawh angin chi inthliarna hi chu ka do a, ka do zel bawk ang," tiin a sawi. Britain tlangval hi F1 driver championhsip hmahruaitu a ni mek, kuminah hian nomawi a kawl lai a humhim thei a nih chuan record nei ṭha ber Michael Schumacher (7 titles) a nih rual thei dawn.

World champion vawi li ni tawh Sebastian Vettel pawhin chi inthliarna a duhloh zia a lantir zel tur thu a sawi ve bawk. F1-ah hian intlansiak an neih hmain driver-te chuan tlan kawngah chi inthliarna an dozia an lantir ṭhin. Pathianni zan dar 6:40 hian Spa-Francorchamps tlan kawngah Belgian Grand Prix an tlan leh ang.