Terry a insawifiah
Chelsea leh Paris St-Germain inkhel ṭum a Zlatan Ibrahimovic red card hmuh chungchang an sawi zui zel a, inkhelh bana Swedish forward ṭawngkam an khel zui bawk. Chelsea captain John Terry chuan Ibra red card hmuh dawna an chet dan chu tih awm lo a nih hran loh thu a sawi.
Stamford Bridge-a inkhelah minute 31-naa Chelsea midfielder Oscar tlawh vangin PSG striker Ibrahimovic chu refree Bjorn Kuipers-a'n a hnawtchhuak. Ibra-a'n red card hmuh chhanah Chelsea player ten refree an thunun vangah a ngai a, a lungawi loh thu leh Chelsea player te a elsen thu uar takin a sawi chhuak.
Red card hmutu Ibra chuan, "Chelsea player-te chet dan kha naute ang mai an ni. Awm lo takah red card ka hmu a, lawmna tur nge lawm loh tur pawh ka hre thiam lo zawk hial a ni," tiin a sawi.
Kum 34-a upa Terry ve thung chuan chuan, "Red card kha phawrh awm reng a ni, refree khan a tih tur dik tak a tiah ka ngai," tiin Sweden captain thusawi a chang let.
England captain hlui chuan sawi chhunzawmin, "Team tin hian ṭhatna leh ṭhat lohna, chakna lai leh chak lohna lai kan nei vek. Kan teammate-te'n harsatna an tawk a nih chuan an dinhmun hrechiang tur leh an thlavang hauh tur a kal hnaih kha ka tih tur a ni. Hla tak aṭang a thlirin kan enliam ngawt thei lo. Referee bula va kal khawm kha thil mawi tak chu a ni lo maithei, mahse game-ah chuan thil chi hrang hrang hi a thleng ve ṭhin," tiin a sawi.