Penalty 12-naah Mizoram an chak lo!

Minute 90-ah 0-0. Extra time-ah 1-1. Penalty pet zawh vek hnuah 9-9. Player pakhat ve ve thlan lehah Punjab an chak ta.

Santosh Trophy semifinal-ah champion nawn tum Mizoram aiin a thlengtu Punjab an vannei zawk a, penalty ṭum 12 pet zawhah hnehna an chang.

Nimina Guru Nanak Stadium, Ludhiana-a inkhel­ah hian hun pangngaiah goal a lut lo a, extra time-a Punjab-in hma an hmahruaina goal chu Mizoramin Lalbiakhlua hmangin an sut a. Penalty shootout-ah 10-9 in an chak.

Tute nge inlan?

Goalkeeper : Lalawmpuia

Defenders : Ronald Zothanzama, Lalrinchhana Tochhawng, Lalruatthara, Lallawmzuala

Midfielders : Lalbiakhlua, Samson Ramengmawia (C), Johny Lalfakzuala

(V. Lalṭanpuia 55'), H.Lalmuankima (Laldingngheta 37')

Forwards : F. Lalrinpuia, Zico Zoremsanga

(Joseph Lalnunpuia 55')

Goal a lut lo

Mizoramin record ṭha tak nen semifinal an lut a, Punjab-in an khingpui an hrechiang a, defensive game an khel a. Punjab-in player pahnih chiah an nawr tir a, a bak zawngin goal venhim hna an thawk.

Mizoramin goal khung tumin nawr mah se Punjab tlar hnung chhah ṭha tak an su tlang thei lo a, pumrua an inlen hleih avangin first half-a ṭum nga ngawt corner kick an hmuh pawh an hmang ṭangkai lo.

Inkhel thunun siin Mizoramin goal khungna hun ṭha an nei meuh lo a, forward F. Lalrinpuia leh Zico Zoremsanga-te Punjab defender pa sang karah an thamral.

Inkhel tidanglam turin first half-ah Lal­muankima aiah Laldingngheta luhtir a ni a, Bethlehem Vengthlang tlangval hi goal khung tuma Mizoram nawrna ber a ni.

Second half ṭan aṭanga minute 10-ah Mizoram-in substitution pahnih an siam a, Joseph Lalnunpuia leh V. Lalṭanpuia-te an luhtir a, goal erawh a luh phah chuang lo. Captain Samson Ramengmawia leh Ronald Zothanzama-te freekick bak goal hlauhawm an nei lo a, Punjab pawhin an nei bik chuang lo.

A goal ta

Extra time minute linaah Punjab forward Manvir Singh-a'n goal a khung a, defender Rinchhana ball pet sual vanga goal lut a ni.

Goal luh hnuah Mizoramin an nawr na sawt a, minute 105-naah Dingngheta'n mual vei lamah ṭha taka la lutin, ball duhthusam a vawrh lut a, Biaktea'n a pet goal chiang hle. Goal dang a luh belh tawh lo.

Penalty chu

Punjab-in penalty an pet hmasa zawk a, vawi hnihna pettu Gurtej Singh-a pet chu keeper Lalawmpuia'n a dang. An pet goal zel a, defender Ronald-a'n chakna goal khung theihna hun ṭha a nei a, a hlah tlat.

An pet chho zel a, ṭum riatnaah Punjab lamin an hlah leh a, Mizoramin chakna hun ṭha an neih chu Lawmzuala'n hun a hlah ve leh. Player 11-te'n an pet chhuah vek hnuah chak zawk an awm lo a, pet nawn a ṭul.

Punjab tan captain Ravinder Singh-a'n a pet goal a, Lalruatthara'n a pet hmasak zawkah khung mah se ṭum hnihnaah a pet goal lo. Punjab an chak a, Mizoram champion nawn tumna a thamral.

Mizoram manager Vanlalngheta chuan, "Chak theihna hun ṭha vawi hnih kan nei a, kan hmang ṭangkai zo lo. Vanduai chang hi a awm ṭhin a ni. Kan khel chhe lutuk lo a, kan chak lo erawh hrehawm kan ti takzet. Mizo mipuite beiseina kan hlenchhuak thei lo hi pawi kan ti a, Mizo mipui ngaihdamna kan dil a ni. Kan inhnemna erawh tun hi Santosh Trophy tawpna tur a la ni lo a, kan la champion leh em em ang tih hi a ni," tiin Vanglaini palai a hrilh.