Final-ah Services leh Punjab

Pathianni chawhnu dar 2:30 hian Guru Nanak Stadium, Ludhiana-ah Santosh Trophy final khelh a ni dawn a, inkhel tur hi inelna thlengtu Punjab leh 2013 champion Services te an ni.

Services hian tun hnaiah record ṭha tak an nei a, kum thum chhungin vawi hnih an champion. 2013-a an champion kha a zawna an champion-na chiah a ni.

Services champion hnuhnun ber ṭum khan Mizo tlangval pahnih an pawimawh hle. Lal­lianmawia'n goal nga khungin top scorer a ni a, midfielder Ramniengmawia chu best player a thlan a ni. Tun ṭumah hian for­ward Lianmawia a awm tawh lo a, amaherawhchu Ramthar tlangval Mawia leh Aizawl FC tan pawha khel tawh midfielder Francis Zonuntluanga te an kawl a, Mizo tlangvalte hi player pawimawh an ni. Anni bakah hian goal thum khung tawh Arjun Tudu-te an pawimawh ang.

Punjab leh Services te hi group khatah an awm a, goal awm loin an inhnehtawk. 2013 khan semifinal-ah inhma­chhawn a, Services 3-1 in an chak a; 2011 khan quarterfinal league-a khelh a ni a, 2-2 in an inhnehtawk.

Finala an inhma­chhawn hnuhnun ber erawh 2008 final kha a ni a, Punjab hi Jaspal Singh-a penalty hmangin 1-0 in an chak.