Third round-ah Serena a lut

US Open khelh laiah hmeichhe singles champion tura rinkai Serena Williams chuan harsatna lian tham tawk loin third round a inhlangkai. Nimin zing inkhelah Serena hian Margarita Gasparyan chu 6-2, 6-4 in a hneh.

Kum 38 mi Serena hian set hmasa zawkah rin loh tak maiin a service vawi hnih a hloh, mahse a khingpui Russian nula service hi vawi thum chhuhsak letin harsa lutuk loin a tlang. Third round-ah chuan 2017 champion Sloane Stephens a hmachhawn leh ang.

Grand Slam vawi 23 champion tawh Serena chuan, "Ka khingpui leh tur Stephens hi player ṭha tak a ni, tun inelna neih laiah pawh a khel ṭha tluang hle. Inrintawkna a ngahin a ball vuak a dik," tiin atan fimkhur a ngaih tur thu a sawi lawk.

Flushing Meadows, New York bikah Serena hian match 103 zet hnena a chang ta, Open Era china record nei ṭha Chris Evert-i record (101 wins) chu a lehpel tawh, record a siam chhunzawm zel pawh a rinawm.

Inkhel dangah Grand Slam vawi hnih champion tawh Garbine Muguruza chu Tsvetana Pironkova lakah 7-5, 6-3 in a chak lo. Pironkova hian fa a neih avangin rei tak chhung a inkhel thei lo, 2017 Wimbledon hnuah tournament a khelh lehna hmasa berah a khel ṭha hle.

Kum 32 mi Pironkova chuan, "Ka beisei aiin ka khel ṭha, ṭha takin ka khel leh thei ang tih chu ring mah ila inelna liana player ṭha hneh nghal hi chu ka la ring phak bik lo," a ti. Third round-ah chuan seeded 18-na Donna Vekic nen an inkhel leh ang.

Hmeichhe singles inkhel dangah Australian Open champion Sofia Kenin, 2017 US Open champion Sloane Stephens leh seeded pasarihna Madison Keys bakah kum 19 mi Amanda Anisimova te chuan an khingpui ṭheuh an hneh bawk.

Britain nula Johanna Konta erawh a chak lo. Seeded pariatna hi a khingpui world number 77 Sorana Cirstea lakah chak tura rinkai zawk ni mah se 2-6, 7-6 (7-5), 6-4 in a chak lo - Janaury thla a khelh Australian Open-ah khan hneh nei loin a lo tla tawh bawk a ni.