AC Milan tan Ibra a khel zel dawn

Swedish striker ropui Zlatan Ibrahimovic chuan AC Milan tana kum khat dang khelh chhunzawm turin contract thar a ziak a, he thu buatsaih a nih lai hian Italian club lamin official taka puanzarna erawh an la nei lo thung. 

Kum 38 mi ni ve tawh Ibra hian social media lamah, "Ka sawi tawh ang khan ka inbuatsaih ṭan mai chauh zawk a ni e, AC Milan," tiin a ziak thung a, contract thar hi a ziak ngei niin a lang. Sky Sport Italia chuan Ibra hian kum khatah pound maktaduai 6.17 a hlawh dawn niin an tarlang a, hetihrual hian professional footballer contract-a an uar tak khelh ṭhat dan a zira hlawh belh theih tur ang chi erawh a awm lo thung. 

AC Milan hian season thar atan training ṭan leh tawh mah se Swede striker erawhin squad a la zawm rih lo a, Rossoneri (AC Milan sawina) technical director Paolo Maldini chuan Ibra chelh beh chu an hna hmasa a nih tur thu a lo sawi tawh a ni. Zlatan hian MLS club La Galaxy-a chhuahsan hnuin December 2019 khan season tawp thlenga khel turin AC Milan-ah contract a ziak a, a contract hi a ṭul dan a zira kum khat dang pawhsei theih turin an dah. Milan tan hian season chanve chhungin match 20-ah goal 11 khungin assist vawi nga a nei a, goal 16-a thawk chhuak tihna a ni - Milan tan contract thar pek loh chi a ni lo.