Khatla dang thei an awm lo, hma an hruai zel

Samsung 3:16 Plan Solution Mizoram Super League-in um boruak a lian zel. Zarkawt BCA-in Mission Veng Vikings 77-64 in an hneh a, hmahruaitu Khatla TBL-in 81-61 in Chaltlang Ryders an hneh ve tho avangin MSL table a danglam phah lo.

BCA an kal zel

Zirtawpni tlaiah team ṭha pahnih Zarkawt BCA leh Mission Vikings an inkhel a,a hmuhnawm hle. Mission Veng Vikings lamin a tirah bul ṭan ṭha zawk mah se an squad neih chhah tawk loh an tuar a, first quarter leh second quarter-ah hmahruaitu ni zawk mah se hun tawp lamah Zarkawt BCA an in lehthal tir leh a ni.

Zarkawt BCA tan point guard Michael F.Lalawmpui-a'n bul ṭan lo mah se, a luh hnuah BCA-in an mamawh chhan a rawn tilang a, points 19 lai rawn hlawhchhuakin rebounds vawi ruk a rawn la bawk.

Mission Veng Vikings tan Lalrina Renthlei bawk a ṭangkai leh a, points 20 lai a team tan hlawhchhuak mah se a chakpui zo ta chuang lo a ni.

Zarkawt BCA Asst.Coach Lalruatfela chuan, "Vikings nena kan inkhelh hi inenchhin nan hman kan duh a, kan players bul ṭan ngai lo te'n bul ṭan se kan duh avangin kan player pawimawh Zorinsanga leh Jackson Lalrintluang-a te pawn bul an ṭan lo. Kan team dinhmun chiang taka kan hriat duh vang a ni. Kan practice-naah shooting kan zir nasa a, a tirah hnufual mah ila kan shooting game khan min chhanchhuak ta a ni," a ti.

Afela chuan vengchhung mipui mai bakah veng hrang hrang aṭanga anmahni ṭawiawmtu te ṭawiawmna chu rin phak bak a nih thu sawiin an lawm takzet thu a sawi.

Khatla ropuina a zual zel

Khatla TBL in Mizoram Super League champion hmasa ber nih an tumna kawngah an kalkawng daltu an la tawng lo a, Zirtawpni zan khan an rawlthar player-te chhawr ṭang­kaiin Chaltlang Ryders 81-61 in an sawp.

Khatla lamin an player naupang zawkte an rawn thawhchhuahpui a, an tisual lo. Eddie Zaithanmawia'n a hun ṭha neihah a theihna rawn pochhuakin points 12 lai a team tan a rawn score a, rebounds 15 ngawt a nei bawk. Inkhel ṭan tirh aṭangin Khatla TBL an chungnung nghal a, vawi li khelh tawha chak hmel la hmu lo Chaltlang Ryders tan tun aia ṭha zawka khel tur chuan an ṭan fe a ngai ang.

Khatla TBL manager Lalawmpuia Pachuau chuan, "Kan khel ṭha thawkhat viauin ka hria. Kan senior player-te kan chhawr rim deuha kan inhriat vang leh naupang zawk te'n game tam zawk khel se kan duh avangin players naupang zawk kan khelh tir a, kan beisei ang takin an khelchhuak a ni, " tiin an rawlthar rual te chu a fak.

P.Om-a chuan khawtlang mipui ṭawi­awmna chu rin phak bak a nih thu leh anmahni ṭawiawmtu te chungah an lawm takzet thu a sawi a, ṭawiawm chhunzawm zel turin a sawm.