Mayweather leh Pacquiao te'n media an hmachhawn

Khawvelin a hmu châk a, a beisei a, a nghak zel. Boxing khawvela sulhnu nei ṭha pahnih Floyd Mayweather leh Manny Pacquiao inhnek tur boruak a lian tawh hle.

Mayweather leh Pacquiao te chuan kar liamta khan Los Angeles khawpuiah chanchinthar lakhawmtu te an kawm a, May 2-a an inhnek tur chungchang an sawipui.

Vawi 47 inhneka vawi 47 chak thei Mayweather a ṭawng pawr a, Pacquiao nen an inhnek hunah chuan khawvel pumpui a chawlh ṭhup tur thu a sawi.

Kum 38-a upa May­weather chuan, "May 2-ah khawvel hi a chawl ṭhup dawn. Mayweather Vs Pacquiao hi khawvel chanchina inhnek ropui ber a ni dawn a ni," a ti.

Division panga a world champion ni thei Mayweather chuan, "Ka record ṭha tak vang hian Pacquiao hi a zam dawn a, chu chuan min pui dawn a ni," tiin a chak zawk tur thu a sawi.

Mayweather chuan Pacquiao-a team te chu a fak zui a, an inhnek theihna tura an hmalakna avangin lawmthu a sawiin, "Khawvelin a hmuh châk inhnek a hmuh theihna tura kan thawh hona hian minti lawm hle a ni," a ti.

Filipino boxer Manny Pacquiao-a zam lo a, "Mayweather hneh hi boxing tan a ṭha a ni. Miin hlawhtlinna ropui tak an chan chuan an 'game' khelh kha an thunun niin an in hre tlat a, hei hi boxing tan a ṭha lo a ni," a ti.

Khawvela division pariat champion thei awm chhun Pacquiao chuan, "He hmunah hian tuma hnehtheih loh hi awlsam takin ka hneh thei a ni tih tilang turin ka lo kal a ni," tiin a ṭawng pawr hle.

Kum 36-a upa Pac­quiao chuan Mayweather aia hnek na zawk te pawh a lo tukdawl tawh ṭhin thu sawiin, "Ka ke che rang zel leh ka kut hman thiam em em hi ka chakna tur chu a ni. Miguel Cotto leh Antonio Margarito-te kha an hnek a na em em a, mahse ka hneh tho a ni," a ti.

Boxing Writers Asso­ciation of America (BWAA), World Boxing Council (WBC) leh World Boxing Organization (WBO) te'n kum 2000-a 'Fighter of the decade' a an thlan Pacquiao hi vawi 64 inhnekah vawi 57 a chak a, chak zawk awm lo a in ṭha ṭhen pui pahnih neiin vawi nga a khingpui te a hneh lo thung.

Pacquiao trainer Freddie Roach chuan, "Khawvela fighter ṭha ber kan bei dawn a ni a, mah se kan hneh ngei ang," a ti. Hetia a sawi mek lai hian Mayweather chuan tham lo takina a lo nuih a, an che nat dan leh an ṭawngkam hian an inhnek tur hlutna a ti sang zel.

Mayweather leh Pac­quiao te inhnek tur hi bo­xing chanchina sum tam­na ber tur a ni a, an pa­hnih hian dollar makta­duai 250 an insem dawn a ni.

En man pawh hi a to dawn khawp mai a, dollar 1,500 (Rs 94,124) aṭanga dollar 7,500 (Rs 4,70,624) inkar ni NGEI tura rin a ni.

Entu zingah Holly­wood mi lar ho bakah khawvel huapa langsar phate an fuam khawm beisei a ni.