Barca-in hmahruai chhunzawm zel

La Liga-a hmahruai mektu Barcelona chuan Lionel Messi goal hnih thun hmangin Eibar chu Inrinni zan khan 2-0 in an hneh. Barca playmaker Xavi chuan club tan game 750-na a khelhna chiah a ni.

Barca hian point 65 hmuin Real Madrid aiin point liin an sang tawh a, Pathianni zan khan Real leh Levante inkhel result a zirin an inthlauhna hi a la danglam thei.

Luis Enrique-a'n inkhelh hmabak hautak tak pahnih an neih thlir ran chungin a player pawimawh Jeremy Mathieu, Andres Iniesta leh midfielder Javier Mascherano te chu a hahchawlh tir bakah Dani Alves leh Jordi Alba te chu hrem vangin an khel thei lo.

Barca hian tunkar hian Champions League-ah Manches­ter City an tum dawn bakah Pathianni khian Real Madrid nen an inhmachhawn dawn bawk.

Inkhel chu

Mikhual Barca-in inkhelh ṭan tirh aṭangin ball an chang tamin goal an nawr nghal.

Minute hnih an khelh tlin chuan Messi leh Ivan Rakitic te chuan goal chance an nei nghal der tawh. Mah se goal erawh a lut nghal mai bik lo a, darkar chanve hnuah a lut chauh. Minute 31-naah Spanish defender Ekiza hand ball vanga Barca penalty hmuh chu Messi-a'n goal-ah a chantir a, 1-0 a ni.

Second half-ah Barca bawk an chungnung chhunzawm leh a, minute 55-naa Rakitic-a corner pet chu a lu hmang a goal khung khat tak Messi an a tauh goal a, 2-0 a ni. Barcelona hian inkhel thununin ball pawh 70% zet chang mah se goal dang erawh an khung thei tawh bik lo.

Eng nge an sawi?

Barca boss Enrique chuan, "A hun taka league hmahruaitu kan ni thei hi ka lawm hle. Mahse inelna hi a la tawp mai dawn lo a, kawng thui tak zawh tur kan la neih avangin kan hah chawl thiang rih lo ang," tiin a sawi.

Spainish midfielder Iniesta chuan, "Kan thawhrimna zarah hmalam kan pan zel e. Zanin hi Barca tan zan chhin chhiah tlak tak a ni a, a chhan chu player pawimawh leh kan entawn ber Xavi-a'n Barca tan game 750-a khelh na zan a nih vang a ni. Xavi hi player ṭha tak leh entawn tlak a ni a, Barca tan a nun a hlan a ni ber mai, ani nen a kan khel dun thei hi vannei ka inti tak zek," tiin a ṭhianpa a ngaihsan thu a sawi.