Pakistan-in World Cup quarter-final an lut

ICC World Cup 2015-ah Pakistan in bul ṭan ṭha lo mah se World Cup bul ṭan ṭha Ireland wicket sarih a hnehin quarterfinal an lut ta.

Adelaide Oval, Adelaide-a inkhelah ṭhumvawrah Ireland an vannei zawk a, bat hmasak an thlang. Ireland tan captain William Porterfield-a che ṭha a, ball 131 a hmachhawnah run 107 a vawchhuak. Ireland hian over 50-ah run 237 vawchhuakin an vaiin an out vek.

Pakistan-in an target an um a, over 46.1-ah run 241 vawchhuakin mi pathum an hloh a, wicket sarihin an chak ta a ni. Pakistan tan Sarfraz Ahmed chuan ball 124 a hmachhawnah run 101 a vawchhuak a, a tawp thleng damin a team a chakpui ta a ni.

Pakistan hi match ruk khelhah vawi li chakin Pool B-ah pathumna an ni a, quarter-final-ah Pool A pahnihna Australia an tum ang. Ireland erawh an vanduai a, West Indies nen vawi thum ve ve chak mah se run rate ṭha zawk West Indies-in quarter-final an luh san ta a ni.