Dan rual loh Bayen Munich

Inrinni zan khan German champion Bayern Munich chuan an khingpui Werder Bremen chu 4-0 in an sawp a, league-ah point 14 zetin hma an hruai fal ta.

League match 25 khelh tawhah Bayern hian point 64 hmu tawhin point 11 chauh an la hlauh thung. Match 13 khelh tur la awmah champion an hnaih tawh hle.

Bayern tan hian inhliam vanga thla li chhung inkhel thei tawh lo captain Philipp Lahm a lo kir leh tawh a, goal keeper Manuel Neuer chu hahchawlh tir a ni a, a aiah Liverpool keeper hlui Pepe Reina chu a vawi khat nan luh tir a ni. Neuer bakah hian inhliam vangin Arjen Robben leh Franck Ribery te an inlan lo.

Bayern-in bul an ṭan ṭha a, inkhel thunun nghalin a tawp thlengin an chungnung tluan chhuak. Thomas Muller chuan Bayern goal hmahruai chu minute 24-naah a khung a, midfielder Muller hian tun season Bundesliga-ah goal 12 a khung tawh. Chawlhlawk hma chiahin David Alaba chuan an goal hnihna free kick aṭangin mawi takin a thun bawk. Second half-ah Robert Lewandowski chuan minute 76 leh 90-ah khung lehin team-te a chak pui chiang hle.

Eng nge an sawi

Bayern boss Pep Guardiola chuan, "Champions League kan khelh hah avangin game harsa tak a ni dawn tih kha kan hre lawk, mah se ka nauten an theih tawp an chhuah avangin point thum kan hmu a ni. Hun harsaah pawh rilru huaisen an pu tlat ṭhin hi he team ka chhuan na em em chu a ni," tiin a naute a fak hle.

Guardiola chuan Neuer a chawlh tir chhan sawi chhun zawm in ,"Neuer hian Bundesliga match 24-a la khelh kim vek bakah Champions League match riat a khel vek bawk. A tan chuan chawlh hahdam ve kha a ṭha a ni. Chutihrualin, Reina pawh player ṭha tak a nih avangin kan ring tawk em em tho," tiin a sawi.

Captain Lahm chuan, "Hun rei tak hnua ka inkhel leh thei hi ka lawm hle. Ka teammate te chungah ka lawm a, a chhan chu hun harsa ka tawh lai pawn min thlahthlam loin min ṭanpui reng ṭhin," tiin a sawi.