World Cup-ah India-in hneh loh la tawng lo

16th March, 2015

ICC World Cup 2015-ah India an chak tluang zel a, Inrinni zing khan Zimbabwe chu wicket ruk a hnehin vawi ruk khelha an vawi ruk chakna a ni. India tan an chakna hi World Cup match a zawna an vawi sawm chakna a ni bawk.

Zimbabwe erawh vawi ruk khelhah vawi khat chiah chak hmel hmuin vawi nga an tlawm a, World Cup-ah beisei tur an nei tawh lo.

Eden Park, Auckland-a inkhelah hian ṭhumvawrah India an vannei zawk a, vawm hmasak an thlang. Zimbabwe an bat a, over 48.5 thleng tlinin an vaiin an out vek a, run 287 an siam tling. Zimbabwe tan captain Brendan Taylor chuan century siamin ball 110 a hmachhawnah run 138 a vawchhuak a, ram tana inkhelh chawlhsan tawh tur Taylor tan hei hi Zimbabwe tana a match hnuhnung ber tawh tur a ni.

Indian bowler-te an che ṭha tlang a, Mohit Sharma, Mohammed Shami leh Umesh Yadav te'n wicket thum ṭheuh an la thei a ni.

India bat hun a thleng a, Rohit Sharma, Shikhar Dhawan, Virat Kohli leh Ajinkya Rahane te hma taka an out avangin India hi chak lo thei dinhmunah an ding hman. Mah se, India tan a hun takah Suresh Raina leh boruak rit tak hnuaia a khelh hahdam thiam vanga 'Captain cool' tia an koh MS Dhoni te an lo dingchhuak a, Raina hian ball 104 a hmachhawnah run 110 siamin Dhoni hian ball 76 a hmachhawnah run 85 a vawchhuak thung.

An pahnih hian a tawp thleng damin India in over 48.4-ah run 288 an vawchhuak a, mi pali chiah hlohin a chak zawkah an ṭang ta a ni.

India captain MS Dhoni chuan, "Zimbabwean bowler te'n an khelh ṭhat avangin kan chak zo lo ṭep a ni. Suresh Raina hi kan player pawimawh tak a ni a, kan partnership ṭha tak khan min chhanhim a ni," a ti.

Zimbabwe wicketkeeper Brendan Taylor chuan ram tana a match hnuhnung ber a khel a, World Cup zawh hian English county cricket club Nottinghamshire tan a khel dawn.

Kumin World Cup-ah kum 29-a upa Taylor hian century vawi hnih vawchhuakin ODI match-ah century vawi riat a vawchhuak tawh a, Zimbabwe palyer zinga century vawchhuak ngun ber record niin Zimbabwe tana World Cup run siam hnem ber a ni bawk.