Juve-in champion hnaih zel

Serie A-ah hmahruaitu Juventus an chesual duh lo. Inrinni zan khan minute 70-naa Alvaro Morato goal hmangin Palermo an hneh.

Juventus hian point 64 an hmu tawh a, anmahni hnaih bertu Roma nena an inthlauhna chu point 14 lawih a ni tawh. Pa­hnihna Roma-in zanin dar 1:30 hian Sampdoria an mikhual ang.

Stadio Renzo Bar­bera-a inkhelah Bianco­neri-in (Juventus sawina a ni a, 'a dum leh a var' tihna a ni) Paul Pogba, Andrea Pirlo, Martin Caceres, Kwadwo Asamoah leh Romulo te an chhawr thei lo a. Nilaini zana Borussia Dortmund nen Champions League an khelh dawn avangin star player ṭhen­khat an awl tir bawk.

Manager Massi­miliano Allegri-a'n a player neih ṭhat ber a phochhuah loh avangin goal nawr a na tawk lo a, mah se mamawh tawk erawh an khung. Second half-ah Spanish striker Morata chuan a ke vei lamin mawi takin a pet lut a, Juve chakna goal a ni.

Thla nga chhungin Palermo-in an khel­mualah hneh loh an tawng tawh lo a, Juve lakah an record duhawm tih tawp a ni.

Juve manager Allegri chuan, "Inkhel awlsam a ni lo a, ka player-te'n player puitling an ni tih an lantir a ni," a ti.

Champions League chungchang sawi kaiin Italian manager chuan, "Inkhel harsa tak a ni dawn a, chutihrualin quarterfinal lut turin kan dinhmun a ṭha zawkin ka hria," tiin a sawi.

Juventus hian an khelmualah Borussia Dortmund 2-1 in an hneh a, second leg hi Ger­many-a khelh tur a ni.

Serie A inkhel dangah mual neitu Cagliari-in minute 20-naa Joao Pedro hmanga an hmahruaina goal an hum him thei lo. Injury time-ah Matias Vecino hmangin Empoli-in an sut a, 1-1 in inkhel a tawp.