Laipui puak riin Chelsea beng a thleng
Season tawp lamah Arsenal laipui hlo a ṭang ṭha a, a puak duh hle. Inrinni zan khan Emirates Stadium-ah West Ham United 3-0 in an sawp. Manchester City erawh Burnley lakah an mualpho a, Arsenal nen an inkarah point khat chiah a awm tawh.
Hmahruaitu Chelsea dinhmun a ṭha zel a, umtu an la awm a nih ngai chuan City chauh ni loin Arsenal pawh chhiar tel a ṭul ang.
Arsenal-in Olivier Giroud, Aaron Ramsey leh Mathieu Flamini te goal hmangin West Ham an hneh a. Burnley-in minute 61-naah George Boyd-a goal hamngin Manchester City an hneh ve bawk.
Goal Class
FA Cup aṭanga Manchester United pet chhuaktu Arsenal-in Premier League-ah result ṭha an neih chhunzawm a, an mikhual West Ham game mawi khelh dan an zir tir.
Arsenal-in inkhel an thunun nachungin goal an khung thei lawk lo a, West Ham goalkeeper Adrian a che ṭha hle. Chutihrualin West Ham midfielder Kevin Nolan-a volley pui zet keeper David Ospina dan goal luh hma a nih avangin a chinchhiah tlak hle.
First half-ah West Ham an ṭang tluan thei lo a, Arsenal-in passing game nalh takin West Ham tlar hnung an ṭhiat a, a tawpna khartu Giroud a ni a, goal class sang tak a ni.
Second half-ah Diafro Sakho hoin West Ham-in nawr let mah se goal khung tur khawpin chuan an nawr na tawk lo. Hun tawp lamah Arsenal-in an phu ang ngeiin Ramsey leh Flamini te hmangin goal hnih dang an khung a, Ramsey goal luhna turah Giroud a pawimawh leh bawk.
City an mualpho
Burnley-in league match hnuhnung 13 leh Cup-a an inkhelh tawhnaah Manchester City an hneh lo a, an hneh hnuhnun ber chu October 1974 kha a ni.
Inrinni zan khan Burnley hian champion tum Manchester City chu an khelmual Turf Moor-ah midfielder Boyd-a goal hmangin an hneh a, City captain Vincent Kompany head ṭhat tawk loh vang a ni.
Burnley chak dan a awlsam lo a, Edin Dzeko goal khung tur chu keeper Tom Heaton-a'n a dan sak a; Sergio Aguero-a'n goal zawnah tauh thei lo bawk. Hun tawp hnaih lamah Pablo Zabaleta chu penalty area-ah tih tluk a ni a, referee Andre Marriner-a'n penalty a pe lo bawk.
Manchester City manager Manuel Pellegrini chuan, "Kan khelh dan pangngai a ni a, kan khelh chhiatna em em ka hmu lo. Goal khung theihna tur ṭum thum aṭanga ṭum li kan nei a, kan khung lo. Burnley erawhin target-ah vawi khat chiah an pet a, a goal lawi si," tiin an vanduai thu a sawi.
Pellegrini chuan sawi chhunzawmin, "Point kan hloh apiangin champion kalkawng a harsa tial tial a. Amaherawhchu kan beidawng tihna erawh a ni lo, chhiarkawp dan hmanga kan champion theih chhung chuan theihtawp kan chhuah zel ang," tiin a sawi.
# Team Pld GD Pts
1 Chelsea 27 35 63
2 Man City 29 31 58
3 Arsenal 29 26 57
4 Man Utd 28 21 53
5 Liverpool 28 12 51
6 Tottenham 28 7 50
7 Southampton 28 19 49
8 Stoke City 29 -2 42
9 Swansea City 28 -4 40
10 West Ham 29 2 39
11 Newcastle 28 -11 35
12 Crystal Palace 29 -6 33
13 West Brom 29 -9 33
14 Everton 28 -8 28
15 Hull City 29 -11 28
16 Aston Villa 29 -19 28
17 Sunderland 29 -20 26
18 Burnley 29 -21 25
19 QPR 29 -22 22
20 Leicester City 28 -20 19